പോത്തുവളർത്തൽ ആദായ സംരംഭം

ശരിയായ തയാറെടുപ്പുകളോടെ തുടങ്ങണം

- ഡോ. വി. പ്രശാന്ത്

താരതമ്യേന ചെലവ് കുറഞ്ഞതും, നടത്തിക്കൊണ്ടു പ്രയാസമില്ലാത്തതും, എന്നാൽ നല്ല ആദായമുണ്ടാക്കാൻ കഴിയുന്നതുമായ സംരംഭമാണ് പോത്തുവളർത്തൽ. സംസ്ഥാനത്തു മാംസാവശ്യം ഏറെ വർധിച്ചിട്ടുണ്ടെങ്കിലും, ഉൽപാദനം വളരെക്കുറവാണ്. അതിനാൽ, മാംസാവശ്യത്തിന് നമ്മൾ കൂടുതലായും ആശ്രയിക്കുന്നത് അന്യ സംസ്ഥാനങ്ങളിൽനിന്ന് കൊണ്ടുവരുന്ന, ഗുണനിലവാരം ഉറപ്പിക്കാൻ സാധിക്കാത്ത ഉരുക്കളെയാണ്.

കേരളത്തിൽ മാംസം കഴിക്കുന്ന മിക്കവർക്കും പോത്തിറച്ചിയോട് താൽപര്യമുള്ളതിനാൽ പോത്തുവളർത്തലിനു സാധ്യതയേറെ. 4 - 6 മാസം പ്രായമുള്ള ഒരു പോത്തു കുട്ടിക്ക് ശരാശരി 60 - 80 കിലോ തൂക്കം വരും. ഇത്തരം പോത്തുകുട്ടികളെ 9,000 - 12,000 രൂപയ്ക്ക് വാങ്ങാനാവും. അവയെ ഒരു വർഷം വളർത്തിയാൽ 35,000 - 40,000 രൂപയ്ക്കു വിൽക്കാം.

പോത്തിറച്ചിയുടെ മെച്ചങ്ങൾ

പോത്തിറച്ചിയിൽ പ്രോട്ടീൻ അളവ് കൂടുതലാണ്. ലൈസിൻ എന്ന അമിനോ അമ്ലവുമുണ്ട്. നാരുകൾ വലുതും, കൊഴുപ്പ് താരതമ്യേന കുറവുമാണ്. പോത്തിറച്ചിയിലെ കൊഴുപ്പിന് വെള്ളനിറമാണ്. പോത്തുകുട്ടിയെ ശരിയായി പരിപാലിച്ചാൽ പ്രതിദിനം 700 - 1200 ഗ്രാം തൂക്കം കൂടും. ഈ രീതിയിൽ 18 മാസം വരെ വളർത്തിയാൽ 250 - 300 കിലോ തൂക്കമെത്തും. ആ പ്രായത്തിലുള്ളതിന്റെ മാംസം മൃദുവും കൂടുതൽ രുചിയുള്ളതുമായിരിക്കും. ഒരു പോത്തിനെ മാംസാവശ്യത്തിന് കശാപ്പ് ചെയ്താൽ ശരീരഭാരത്തിന്റെ 50- 55 ശതമാനം ഇറച്ചി കിട്ടും. മാംസത്തിന്റെ രുചിയെ സ്വാധീനിക്കുന്ന പ്രധാന ഘടകമാണ് അതിലെ ജലാംശം. പാലുൽപാദനപ്രായം കഴിഞ്ഞ എരുമയുടെയോ, പ്രായമേറിയ പോത്തിന്റെയോ മാംസത്തെ അപേക്ഷിച്ച് ഇളം പോത്തുകളുടെ മാംസത്തിൽ ജലാംശം കൂടുതലാണ്. പ്രായം കൂടുമ്പോൾ മാംസത്തിലെ ജലാംശം കുറയുകയും, കൊഴുപ്പ് കൂടുകയും ചെയ്യും.

പ്രധാന ജനുസ്സുകൾ