വയലിലെ രാമേട്ടൻ

കാർഷിക രംഗത്തെ സംഭാവനകൾക്ക് പത്മശ്രീ പുരസ്കാരം നേടിയ ചെറുവയൽ രാമന്റെ വീട്ടിലേക്കും വയലിലേക്കും

- jyothish

നേരം പരപരാന്നു വെളുക്കുന്നതേയുള്ളൂ. എന്നിട്ടും  രാമേട്ടൻ പാടത്തായിരുന്നു. വെയിലുറച്ചു കഴിഞ്ഞാൽ പിന്നെ, സന്ദർശകരുടെ തിരക്കായിരിക്കും. അഭിനന്ദനം അറിയിക്കാൻ വരുന്നവരാണു കൂടുതലും. പിന്നെ, വിവിധ സ്കൂളുകളിൽ നിന്നു കുട്ടികൾ വരും, ഗവേഷകർ വരും, കൃഷിശാസ്ത്രജ്ഞർ വരും. വിത്തിനായി കൃഷിക്കാരും വരും. അപ്പോൾ പിന്നെ പണി മുടങ്ങും. അതു കൊണ്ടാണ് അതിരാവിലെ പാടത്തേക്കിറങ്ങിയത്. രാഷ്ട്രപതിയിൽ നിന്നു രാജ്യത്തിന്റെ ആദരവ് ഏറ്റുവാങ്ങി വന്നതേയുള്ളൂ രാമേട്ടൻ.

"പാടത്ത് ഇപ്പോൾ ഇടവിളയുടെ സമയമാണ്. പയറും പച്ചക്കറിയുമാണു വിളകൾ. മേടവിഷു വരെ ഇതു തുടരും. നീർ ചാലിൽ നിന്നു മുഖം കഴുകിക്കൊണ്ടു രാമേട്ടൻ പറഞ്ഞു.  കൊത്തിയൊരുക്കിയ കൈക്കോട്ടു കഴുകി രാമേട്ടൻ വരമ്പിലൂടെ നടന്നു.

ആചാരങ്ങളും ആഘോഷങ്ങളും അതിന്റെ തനിമയിൽ പിൻതുടരുന്നവരാണു കുറിച്യർ. വിളവെടുപ്പുമായി ബന്ധപ്പെട്ടു കുറിച്യരുടെ ഏറ്റവും വലിയ ആഘോഷമാണു പുത്തരിക്കോൾ. അതൊരു കുടുംബസംഗമമാണ്. ഒരു ദിവസം മുഴുവൻ നീണ്ടു നിൽക്കുന്ന ആഘോഷം. കുടുംബാംഗങ്ങൾ എല്ലാം ആഘോഷത്തിനുള്ള സാധനങ്ങളുമായി തറവാട്ടിൽ ഒത്തുചേരും. മയിൽ എന്നാണു രാമേട്ടന്റെ കുടുംബപ്പേര്. പരദേവതാ ക്ഷേത്രമുണ്ട് കുടുംബത്തിൽ പ്രധാന ചടങ്ങുകളെല്ലാം അവിടെ യാണ്. ഏറ്റവും പ്രാധാന്യമുള്ള ആഘോഷമാണു വിഷു.

വിഷുക്കണി കണ്ട ശേഷം വിത്തൊരുക്കം

“വിഷുവാണ് എല്ലാവരും കാത്തിരിക്കുന്ന ഉത്സവം. വിഷുക്കണി കണ്ടതിനുശേഷമാണ് അടുത്ത വർഷത്തേക്കുള്ള കൃഷി ആരംഭിക്കുന്നത്. കുംഭത്തിൽ മഴ പെയ്താൽ കുപ്പയും പൊന്ന് എന്നാണു പഴമക്കാർ പറയുന്നത്. പണ്ടു കുംഭത്തിൽ മഴ കിട്ടുമായിരുന്നു. ഇപ്പോഴില്ല. പിന്നെ, മീനം വെയിലിനും ഉത്സവത്തിനുമുള്ള മാസമാണ്. മീനവെറി കഴിഞ്ഞാൽ പിന്നെ, മേടവിഷു. വയൽ കന്നു പൂട്ടുന്ന തിരക്കിലായിരിക്കും മേടമാസം വലിയ മൺകട്ടകൾ ഇളകി വീഴും. അതു പൊട്ടിച്ചാണു വിതയ്ക്കുന്നത്. ഈ രീതിയിലുള്ള കൃഷിയൊന്നും ആർക്കും വേണ്ട. 'വരമ്പിലൂടെ വീട്ടിലേക്കു നടക്കുമ്പോൾ രാമേട്ടൻ പറഞ്ഞു.