மலையை ஆக்கிரமிக்கும் காங்கிரீட்காடுகள்... சரிக்கும் இயற்கை!

மனிதர்களின் நாசவேலை வகைவகையாய் தொடர்வதால் இயற்கையின் சீற்றம் பலவிதமாக வெளிப்படுகிறது.

- -பரிதி

அதில் ஒன்றுதான் மேக வெடிப்பு. ஆகஸ்ட் 5ல் உத்தரகாண்ட் மாநிலத்தில் உள்ள உத்தரகாசியில் ஏற்பட்ட காட்டாற்று வெள்ளம் பெரும் பாதிப்பை ஏற்படுத்தியுள்ளது.

100க்கும் மேற்பட்டோர் மாயமாகி இருக்கின்றனர். இதில் 8 ராணுவ வீரர்களும் அடக்கம். 5 பேர் மடிந்துள்ளனர். ஹர்ஷில் பகுதியில் உள்ள கீர் கங்கா கதேராவின் (ஆழமான பள்ளம்) நீர்மட்டம் திடீரென அதிகரித்து, தராலி கிராமத்தையே தூக்கியுள்ளது. பல வீடுகள், ஹோட்டல்களும் அடித்து செல்லப்பட்டிருக்கின்றன.

அதன் பிறகும் 15 அல்லது 20 நிமிடங்களுக்கு ஒருமுறை பேரலை வந்துகொண்டிருந்தது. குப்பை கூளங்கள் அடித்துக் கொண்டு வந்தன. ஓரிரு ஹோட்டல்கள் வெள்ளத்தில் மிதந்து சென்றன. மூன்று -நான்கு மாடி கொண்ட மிகப் பெரிய ஹோட்டல்கள் இருந்தன. அவற்றின் கூரைகள் கூட இப்போது தெரியவில்லை” என்கின்றனர் நேரில் பார்த்தவர்கள்.

ஏற்கனவே கடந்த ஜூன் 25 அன்று பெய்த கனமழை மற்றும் மேகமூட்டம் காரணமாக குலு மாவட்டம் முழுவதும் பெரும் சேதம் ஏற்பட்டுள்ளது. 37 சாலைகள் இன்னும் தடைபட்டுள்ளன, ஏராளமான கிராமங்கள் துண்டிக்கப்பட்டுள்ளன.

100 மி.மீ க்கு அதிகமாக மழை பெய்தால் அவை மேக வெடிப்பு என்று இந்திய வானிலை ஆய்வு வரையறுத்திருக்கிறது. ஹரித்வாரில் மட்டும் குறிப்பாக 303 மி.மீ மழை பெய்திருப்பதால் இது மேக வெடிப்பு என்பது உறுதியாகிறது. அதேபோல் தாராலி அருகே சுகி டாப்பிலும் மேகவெடிப்பு ஏற்பட்டுள்ளது.

சமவெளிப் பகுதியிலும் மேக வெடிப்பு நிகழலாம் என்றாலும், மலைப்பகுதியில் மேகங்கள் குவிக்கப்பட்டு, மோதி மேக வெடிப்பு உருவாக அதிக வாய்ப்புள்ளது.