பாலியல் குற்றங்கள் பெருகுவது ஏன்?

பா.ஜ.க. ஆட்சி செய்யும் குஜராத் மாநிலத்தில், காவல்துறை சார்பில் ஒட்டப்பட்டிருந்த சுவரொட்டி மூலம்... "பெண்களே நள்ளிரவு விருந்துகளில் கலந்து கொள்ளாதீர்கள்.

- -பரிதி

வீட்டிலேயே இருக்கவும், இல்லையேல் நீங்கள் பாலியல் வன்கொடுமையோ அல்லது கூட்டு பாலியல் வன்கொடுமையோ செய்யப்படலாம்" என்று எச்சரித்து இருந்தனர்.

என்னடா இது, பாதுகாப்பு கொடுக்கவேண்டிய காவல்துறையே பயமுறுத்தியுள்ளதே என்று கேட்டால்... காவல்துறை தரப்பு, “சதார்க்தா என்ற தன்னார்வ தொண்டு நிறுவனம், பள்ளிகள் மற்றும் கல்லூரிகளில் போக்குவரத்து விழிப்புணர்வு நிகழ்ச்சிகளை நடத்த விரும்புவதாக கூறி போக்குவரத்து விழிப்புணர்வு தொடர்பான சுவரொட்டிகளை காட்டியது. ஆனால் இதுபோன்ற சர்ச்சைக்குரிய சுவரொட்டிகள் எங்களுக்கு காட்டப்படவில்லை. எங்கள் அனுமதியின்றியே அந்த சுவரொட்டிகள் ஒட்டப்பட்டிருக்கின்றன. புகார் வந்த பிறகு சுவரொட்டிகளை அகற்றிவிட்டோம்” என்றனர்.

இது தொடர்பாக பேசிய குஜராத் ஆம் ஆத்மி கட்சி நிர்வாகி, “கடந்த மூன்று ஆண்டுகளில், குஜராத்தில் 6,500க்கும் மேற்பட்ட பாலியல் வன்கொடுமை சம்பவங்களும் 36-க்கும் மேற்பட்ட கூட்டு பாலியல் வன்கொடுமைகளும் நடந்துள்ளன. ஒரு நாளைக்கு ஐந்துக்கும் மேற்பட்ட பாலியல் வன்கொடுமைகள் பதிவு செய்யப்படுகிறது. முதலமைச்சரும் பா.ஜ.க தலைவர்களும் பெண்கள் பாதுகாப்பு பற்றிப் பேசுகிறார்கள். ஆனால் இன்று அகமதாபாத் போன்ற பெரிய நகரத்தில் ஒட்டிய சுவரொட்டிகள் குஜராத்தின் யதார்த்தத்தை வெளிப்படுத்துகின்றன” என்றார்.

உண்மையிலேயே வட மாநிலங்களில் ரோட்டில் நடந்தாலும், ஆஸ்பத்திரியில் இருந்தாலும் பெண்களுக்கு பாலியல் கொடுமை நடக்கவே செய்கிறது. பீகார் மாநிலம் புத்தகயா மாவட்டத்தில் ஜூலை 24 ஆம் தேதி ஊர்க்காவல் படை ஆட்சேர்ப்பு தேர்வில் கலந்து கொண்ட 26 வயது பெண், உடல் தகுதி தேர்வின் போது மயங்கி விழுந்து ஆம்புலன்சில் மருத்துவமனைக்கு அனுப்பி வைக்கப்பட்டார்.

அப்போது, ஊழியர்கள் ஓடும் ஆம்புலன்சில் வைத்து அவரை கூட்டு பாலியல் வன்கொடுமை செய்துள்ளனர். அதில் தொடர்புடைய ஆம்புலன்ஸ் ஓட்டுநர் வினய் குமார் மற்றும் தொழில்நுட்ப வல்லுநர் அஜித் குமார் ஆகிய இருவரையும் சிறப்பு விசாரணைக் குழுவினர் கைது செய்தனர்.

பீகார் சம்பவத்துக்கு முன்பு கடந்தாண்டு இறுதியில் மத்திய பிரதேசத்திலும் சிறுமி ஒருத்தி ஆம்புலன்ஸ் ஓட்டுநர் மற்றும் நண்பரால் பாலியல் வன்கொடுமை செய்யப்பட்டிருந்தார்.