காணாமல போகும் குழந்தைகள்...காரணம் என்ன?

சமீப காலமாக குழந்தைகள் மாயமாகும் தகவல் அச்சுறுத்தலை ஏற்படுத்தியுள்ளது.

- -எஸ்.ரவீந்திரன்

இது தொடர்பாக வெளியாகியுள்ள புள்ளி விவரங்களின்படி இந்தியாவில் கடந்த 2020ம் ஆண்டு முதல் 4 ஆண்டுகளில் காணாமல் போன 36,000 குழந்தைகள் இன்னும் கண்டுபிடிக்கப்படவில்லை என்று மத்திய அரசு உச்சநீதிமன்றத்தில் தெரிவித்துள்ளது கடும் அதிர்ச்சியை ஏற்படுத்தியுள்ளது.

அதாவது கடந்த 2020 முதல் இதுவரை காணாமல் போன சுமார் 3 லட்சம் குழந்தைகளில் பெரும்பாலானோரை போலீசார் கண்டுபிடித்துவிட்டனர், ஆனாலும் 36 ஆயிரம் குழந்தைகள் இன்னும் கண்டுபிடிக்கப்படவில்லை.

அதிகபட்சமாக மத்திய பிரதேசத்தைச் சேர்ந்த 58,665 குழந்தைகள் காணாமல் போயுள்ளனர். அதில் 45,585 குழந்தைகள் கண்டுபிடிக்கப்பட்டுள்ளனர். 3,955 பேரை இன்னும் கண்டுபிடிக்க முடியவில்லை.

பீகாரில் 24,000க்கும் அதிகமான குழந்தைகள் காணாமல் போயுள்ளனர். அவர்களில் 12,600க்கும் மேற்பட்டவர்கள் கண்டுபிடிக்கப்படவில்லை.

இதே போல ஒடிசாவிலும் 24,291 குழந்தைகள் காணாமல் போயுள்ளதாக கூறப்பட்டுள்ளது.

இது போல இந்தியா முழுவதும் குழந்தைகள் மாயம் என்பது தொடர்கதையாகி வருகிறது.

சமீபத்தில் மகராஷ்டிர மாநிலம், தானே மாவட்டம், நவி மும்பையில் 4 சிறுமிகள், 2 சிறுவர்கள் என 6 குழந்தைகள் மாயமாகினர். உடனே போலீசார் குழந்தைகளை தேடும் பணியில் ஈடுபட்டனர். இதில், கோபர்ஹர்னே பகுதியை சேர்ந்த 12 வயது சிறுவன், தானே ரயில் நிலையத்தில் இருந்ததை கண்டறிந்து அந்த சிறுவனை மீட்டு அவரது குடும்பத்தினரிடம் போலீசார் ஒப்படைத்தனர்.