ஹபீபி

கடையநல்லூரில் கைத்தறி நெய்து பிழைக்கும் முகமது யூசப் (கஸ்தூரி ராஜா) குடும்பம் கால் வயிறு மட்டுமே பசியாறுகிறது.

- 

தறி சத்தம் மட்டுமே கேட்கும் அந்த ஊரில் காலப் போக்கில் நெசவுத் தொழில் நலிந்து கொண்டே போகிறது.

யூசப்பின் தம்பி ஷேக் பகதூருக்கு மனைவியாக வந்து சேர்கிறாள் சாலியா (அனு). அண்ணன் - தம்பி கூட்டுக் குடும்பமாக ஒரே வீட்டில் வாழ்ந்தாலும் குடும்ப வறுமை அவர்கள் மன உறுதியை அசைத்துப் பார்க்கிறது. இதனால் அரபு நாட்டுக்கு வேலைக்கு போக முடிவு செய்கிறார் ஷேக் பகதூர்.

கடல் கடந்து போன தன் கணவருடன் பல ஆண்டுகளாக டேப் ரெக்கார்டு பதிவுகளில் மட்டும் பேசி குடும்பம் நடத்துகிறாள் சாலியா.

பொறுப்பில்லாமல் சுற்றும் அண்ணன் மகன் அபுதாஹிரை (ஈஷா) வெளிநாட்டுக்கு அழைத்துக் கொள்ள நினைக்கிறார் ஷேக் பகதூர். ஆனால், சாச்சா (சித்தப்பா) போல தானும் சொந்த ஊரைப் பிரிந்து போக அபுதாஹிருக்கு விருப்பமில்லை. குறிப்பாக அவன் விரும்பும் நிலோபரை (மாளவிகா மனோஜ்) பிரிய அவனுக்கு விருப்பமில்லை.

அன்றிரவு நிலோபரை பார்த்து மனம் விட்டுப் பேச போன அபு, ஊர் மக்களிடம் வகையாய் மாட்டிக் கொள்கிறான். அந்த சம்பவத்திற்கு பிறகு அபுவும் வெளிநாட்டுக்கு சென்று விடுகிறான். நிலோபருக்கும் திருமணமாகி வெளியூர் சென்று விடுகிறாள்.