അകത്തളത്തിൽ വിളയിക്കുന്ന അർബൻ കിസാൻ

മുറിക്കുള്ളിൽ വിളയുന്ന തക്കാളി ഒപ്പം കാന്താരിയും നാരകവും

- ജയിംസ് ജേക്കബ്

നാലു തരം ലെറ്റ്യൂസ് കഴിച്ചാൽ പോഷകസുരക്ഷ കിട്ടുമോ? പാവയ്ക്കയും വെണ്ടയ്ക്കയും അച്ചി അപ്പയറും വഴുതനങ്ങയും ചീരയുമൊക്കെ ഇല്ലാതെ എന്തു പച്ചക്കറിത്തോട്ടം? - കേരളമാകെ ഒരൊറ്റ നഗരമായി വളരുമ്പോഴും മണ്ണില്ലാകൃഷിയെ മലയാളിയിൽ നിന്ന് അകറ്റുന്നത് ഈ ചിന്തയാണ്. എന്നാൽ, മണ്ണില്ലാകൃഷിയിലൂടെ അൻപതോളം വിളകൾ ഉൽപാദിപ്പിച്ചു കാണിക്കുകയാണ് ഹൈദരാബാദിലെ അർബൻ കിസാൻ. ഫിനാൻസ് പ്രഫഷനൽ വിഹാരി കനഗലുവും ബയോടെക്നോളജി വിദഗ്ധൻ ഡോ. സായിറാം റെഡ്ഡിയും ചേർന്ന് ആരംഭിച്ച ഈ അഗ്രി സ്റ്റാർട്ടപ് ഇന്ന് ഇന്ത്യയുടെ മാത്രമല്ല, ഒട്ടേറെ വിദേശരാജ്യങ്ങളുടെയും ഭക്ഷ്യസുരക്ഷയ്ക്കുള്ള വഴിതുറക്കുന്നു.

മേലേക്കു വളരുന്ന വെർട്ടിക്കൽ ഫാമുകളിൽ മണ്ണും സൂര്യപ്രകാശവുമല്ലാതെ, യുക്തിസഹമായ മുതൽമുട ക്കിൽ ഇലവർഗങ്ങൾ മാത്രമല്ല, കായ്കനികളും പൂക്കളും ഉൽപാദിപ്പിക്കാനുള്ള സാങ്കേതികമികവ് ഈ സ്റ്റാർട്ടപ് സംരംഭം സ്വന്തമാക്കിക്കഴിഞ്ഞു അമേരിക്കയിലാണ് ഇപ്പോൾ ഇവരുടെ ബിസിനസ് കേന്ദ്രീകരിച്ചിരിക്കുന്നത്. എന്നാൽ, തുടക്കം കുറിച്ച് ഹൈദരാബാദിലാണ് ഗവേഷണ വികസന പ്രവർത്തനങ്ങളുടെ ആസ്ഥാനം.

മണ്ണില്ലാകൃഷി കൂടുതൽ ആളുകളിലേക്ക് എത്തിത്തുടങ്ങിയ കാലമാണിത്. നഗരഭവനങ്ങളിൽ ഹൈഡ്രോപോണിക്സ് അടുക്കളത്തോട്ടങ്ങൾ ഒരുക്കി നൽകുന്ന ഒന്നിലധികം സംരംഭങ്ങൾ നമ്മുടെ നാട്ടിലുണ്ട്. അത്തരം ഇൻഡോർ ഫാമുകളിൽ എക്സോട്ടിക് പച്ചക്കറികൾ ഉൽപാദിപ്പിച്ചു വിൽക്കുന്നവർ പോലുമുണ്ട്. ഇതൊക്കെയാണെങ്കിലും നമ്മുടെ ഹൈഡ്രോണിക്സ് ശൈശവദശയിൽ തന്നെ. താങ്ങാനാവാത്ത ഉൽപാദനച്ചെലവും വിദേശ ഇലക്കറികൾ മാത്രം വിളയുന്ന ഫാമുകളും ഈ സാങ്കേതികവിദ്യ ജനകീയമാകുന്നതിൽ തടസ്സമായി .