പുതിയ രാജ്യത്ത് മക്കളുടെ വിദ്യാഭ്യാസം

ജോലി തേടി പുതിയ രാജ്യത്തു കുടുംബവുമായി എത്തുമ്പോൾ മക്കളുടെ വിദ്യാഭ്യാസത്തെപ്പറ്റി ചിന്തിച്ചിട്ടുണ്ടോ? അതിപ്രധാനമാണ് ഈ കാര്യങ്ങൾ

- ഡോ. മുരളി തുമ്മാരുകുടി നീരജ ജാനകി

വിദേശത്തേക്കു കുടിയേറുന്ന പ്രഫഷനലുകൾ അതു ചെയ്യുന്നതു സ്വന്തം നിലനിൽപ്പിനുമപ്പുറം സ്വന്തം കുട്ടികളുടെ സുരക്ഷിതഭാവിക്കു കൂടി വേണ്ടിയാണ്. കുടുംബത്തോടൊപ്പം വിദേശത്തു പോകുമ്പോൾ കുട്ടികളെ കൂടെ കൂട്ടുന്നവർ നേരിടുന്ന പ്രധാന വെല്ലുവിളികളിലൊന്ന് അവർക്കു തടസ്സമില്ലാത്തതും ഫലപ്രദവുമായ വിദ്യാഭ്യാസം ഉറപ്പാക്കുകയെന്നതാണ്. അതുകൊണ്ടുതന്നെ, വ്യത്യസ്ത വിദ്യാഭ്യാസ സമ്പ്രദായങ്ങൾ, സാഹചര്യങ്ങളുമായി പൊരുത്തപ്പെടുന്നതിനുള്ള വെല്ലുവിളികൾ, സാംസ്കാരിക സ്വാധീനം, കൂടാതെ മാതാപിതാക്കൾ പരിഗണിക്കേണ്ട നിർണായക കാര്യങ്ങൾ എന്നിവയെല്ലാം നമുക്കു നോക്കാം.

നാട്ടിൽ നിന്നും വിദേശത്തേക്കുള്ള പറിച്ചുനടൽ കുട്ടികളുടെ വിദ്യാഭ്യാസത്തെ പലതരത്തിൽ സ്വാധീനിക്കും. അവർക്കു പരിചിതമായ സ്കൂൾ, സുഹൃത്തുക്കൾ, നിലവിൽ പരിചിതമായിരുന്ന പാഠ്യപദ്ധതി എന്നിവ ഉപേക്ഷിക്കുമ്പോൾ ആവേശം മുതൽ ഉത്കണ്ഠ വരെ പലതരം വൈകാരിക പ്രതികരണങ്ങളുണ്ടാകാം. കുട്ടികളുടെ ആവശ്യങ്ങളോടും അവരുടെ അക്കാദമിക് കഴിവുകളോടും ലക്ഷ്യങ്ങളോടും ഏറ്റവും ചേർന്നുനിൽക്കുന്ന ഒരു വിദ്യാഭ്യാസ മാർഗം ശ്രദ്ധാപൂർവം ഗവേഷണം ചെയ്തു തിരഞ്ഞെടുക്കണം.

സ്കൂളിങ്ങിന്റെ കാര്യത്തിൽ മാതാപിതാക്കൾക്കു കുറച്ച് ഓപ്ഷനുകളുണ്ട്. ഇന്റർനാഷനൽ സ്കൂളുകൾ, അവിടുത്തെ പ്രാദേശിക സ്കൂളുകൾ (പൊതു/സ്വകാര്യ), അല്ലെങ്കിൽ ഹോം സ്കൂളിങ്. പലപ്പോഴും സ്കൂൾ തിരഞ്ഞെടുക്കുന്നതു പോകുന്ന രാജ്യം, അവിടെ താമസിക്കാൻ ഉദ്ദേശിക്കുന്ന കാലയളവ്, സാമ്പത്തിക കാര്യങ്ങൾ എന്നിവയെ ആശ്രയിച്ചിരിക്കും.

ഇന്റർനാഷനൽ സ്കൂളുകൾ

ഈ സ്കൂളുകൾ സാധാരണയായി ഇന്റർനാഷനൽ ബാക്കലറിയേറ്റ് (IB), ബ്രിട്ടിഷ് IGCSE/A-ലെവൽസ്, അല്ലെങ്കിൽ അമേരിക്കൻ ഹൈസ്കൂൾ ഡിപ്ലോമ സിസ്റ്റം പോലുള്ള ആഗോളതലത്തിൽ അംഗീകരിക്കപ്പെട്ട പാഠ്യപദ്ധതികളാണു പിന്തുടരുന്നത്. ഇംഗ്ലിഷ് മീഡിയം സ്കൂളുകളിൽ പഠിച്ചുവരുന്ന മലയാളി കുട്ടികൾക്ക് അക്കാദമിക് മാറ്റം എളുപ്പമാക്കാൻ ഇതു സഹായിക്കുന്നു.