ആഹാ, ഇവർ മിടുക്കരാണല്ലോ

ഗോൾഡ് മെഡലിലോ ഒന്നാം റാങ്കിലോ കാര്യമില്ല. വേണ്ടത് പ്രായോഗികമായ കഴിവുകളാണ്.

- അഞ്ജലി അനിൽകുമാർ

നമ്മുടെ നാട്ടിലെ ഒരു ശരാശരി പ്രവൃത്തി ദിവസം സമയം: രാവിലെ 08:30, അമ്മാ... എന്റെ ഇംഗ്ലിഷ് നോട്ട് ബുക്ക് കണ്ടോ? അപ്പാ... ടൈയും ബെൽറ്റും കിട്ടിയോ? തുടങ്ങിയ ചോദ്യങ്ങളുമായി അങ്ങോട്ടുമിങ്ങോട്ടുമോടുന്ന കുഞ്ഞുങ്ങളും അവർക്കു പിന്നാലെ പായുന്ന മാതാപിതാക്കളുമില്ലാത്ത വീടുകൾ ചുരുക്കമായിരിക്കും.

അതേസമയം ഇത്തരം തിരക്കുകളും കരച്ചിലും ബഹളവുമൊന്നുമില്ലാതെ, സ്കൂളിൽ പോകണമെന്ന ചിന്ത പോലുമില്ലാതെ ദിവസം ആരംഭിക്കുന്ന ചില കുട്ടികളുമുണ്ട്.

ഏറെ പ്രിയപ്പെട്ട ചിത്രകലയിലൂടെയാണ് എറണാകുളം തൃപ്പൂണിത്തുറ സ്വദേശി കരുണപ്രിയയുടെ ദിവസം ആരംഭിക്കുന്നത്. തൃശ്ശൂർ കൊരട്ടിയിലെ വീട്ടിൽ അൻവിക ക്കുട്ടി പ്രിയപ്പെട്ട കളിപ്പാട്ടങ്ങളും മാപ്പുമെല്ലാമെടുത്ത് അടുത്ത റോഡ് ട്രിപ്പിന് ഒരുങ്ങിക്കഴിഞ്ഞു. സ്കൂളിൽ പോകേണ്ടെങ്കിലും ഓഫിസ് കാര്യങ്ങളുമായി തിരക്കിലാണ് പെരുമ്പാവൂരിലെ കുട്ടി സിഇഒ മുഹമ്മദ് അമീൻ.

അമീന്റെ ഇളയ സഹോദരി പത്തുവയസ്സുകാരി ഫാത്തിമ ഫർഹാന മോണിങ് ബാച്ചിലെ കുട്ടികളെ എഐ ടൂളുകൾ പഠിപ്പിക്കുകയാണ്. അതേസമയം അടൂരിലെ സൃഷ്ടി കലാക്ഷേത്രയിൽ കുട്ടികളെ ഡാൻസും കളരിയും പരിശീലിപ്പിക്കുകയാണ് ഇരട്ട സഹോദരങ്ങളായ സൈമണും സാറയും. അവരുടെ അനുജത്തി സൂസൻ ത്രടക എന്ന നേത്ര വ്യായാമം ചെയ്യുന്നു.

സ്കൂളിൽ പോകാതെ ഈ കുട്ടികൾ എവിടെ എത്താനാണ് എന്ന ആശങ്കയുമായി എത്തുന്നവർ പോലും ഇവരുടെ നേട്ടങ്ങളെ അടുത്തറിയുമ്പോൾ “ആഹാ ഇവർ മിടുക്കരാണല്ലോ!' എന്ന് ചിന്തിച്ചുപോകും .

ഒട്ടക കുഞ്ഞുങ്ങളെ കണ്ടിട്ടുണ്ടോ?

“മോൾടെ കൂട്ടുകാർ വർഷാവസാന പരീക്ഷ എഴുതാനിരിക്കുമ്പോൾ കരുണപ്രിയയേയും കൂട്ടി ഞങ്ങൾ റോഡ് ട്രിപ് പോയി. അന്നു കണ്ട കാഴ്ചകൾ ഇന്നും മോൾടെ മനസ്സിലുണ്ട്.'' രസകരമായ ഒരു യാത്രാനുഭവത്തിലൂടെയാണ് രശ്മിയും ജാനും സംസാരിച്ചു തുടങ്ങിയത്.

“മോൾക്ക് പത്തുവയസ്സുള്ളപ്പോൾ ഞങ്ങൾ ജയ്സാൽമേറിലേക്കു യാത്ര പോയി. ഒരു ഗ്രാമത്തിലൂടെ യാത്ര ചെയ്യുമ്പോൾ വിജനമായ വഴിയിൽ നിന്നൊരു പ്രായമായ മനുഷ്യൻ കൈവീശി വണ്ടി നിർത്തൂ എന്ന് ആവശ്യപ്പെട്ടു. ഞങ്ങൾ കാർ നിർത്തി. അയാൾ ഞങ്ങളോട് അദ്ദേഹത്തിന്റ വീട്ടിലേക്കു ചെല്ലാൻ പറഞ്ഞു. ചെറിയ ഭയത്തോടെയാണെങ്കിലും ഞങ്ങൾ അദ്ദേഹത്തെ പിന്തുടർന്നു.