താരമാകാൻ സിയറ

ടാറ്റ സിയറയുടെ രണ്ടാംവരവ്. പെട്രോൾ ഡീസൽ മോഡലുകൾക്കു പിന്നാലെ ഇലക്ട്രിക്കും

- നോബിൾ എം. മാത്യു

എസ് യു വി പ്രേമികളുടെ നീണ്ട കാത്തിരിപ്പിനൊടുവിൽ സിയറ നിരത്തിലേക്കെത്തുകയാണ്. ലോഞ്ചിനു മുന്നോടിയായി സിയറയുടെ പ്രൊഡക്ഷൻ മോഡലിനെ ടാറ്റ മുംബൈയിൽ നടന്ന "സിയറ ഡേയിൽ' പ്രദർശിപ്പിച്ചിരുന്നു. 1991ൽ ആണ് ടാറ്റ സിയറയെ വിപണിയിലെത്തിക്കുന്നത്. തദ്ദേശീയമായി നിർമിച്ച ആദ്യ ഇന്ത്യൻ എസ്യുവിയായി രുന്നു സിയറ. 2013ൽ വിപണിയിൽ നിന്നു പിൻവാങ്ങി. ഐതിഹാസിക മോഡലിന്റെ രണ്ടാം വരവാണിത്. ചതുരവടിവിനൊപ്പം പുതുതലമുറ ഡിസൈൻ ഘടകങ്ങളും നൂതന ഫീച്ചറുകളും സമന്വയിപ്പിച്ചാണ് രൂപകല്പന.

കരുത്തുറ്റ രൂപം

വലുപ്പത്തിൽ ടാറ്റ ഹാരിയറിനു താഴെയാണ് സ്ഥാനം. എസ് യു വി പ്രേമികളെ ആകർഷിക്കുന്ന ബോൾഡ് രൂപമാണ് ഹൈലൈറ്റ്. കനം കുറഞ്ഞ ഫുൾവിഡ് ഡേ ടൈം റണ്ണിങ് ലാംപ്. എയർവെനോടുകൂടിയ പിയാനോ ബ്ലാക് ഫിനിഷിലുള്ള ഗ്രിൽ. വലുപ്പം കുറഞ്ഞ പ്രൊജക്ടർ ഹെഡ്ലാംപ്, പിക്സൽ ആകൃതിയിലുള്ള ഫോഗ്ലാംപുകൾ. പിയാനോ ബ്ലാക് ഫിനിഷിലുള്ള വലിയ ബമ്പറും അതിൽ സിൽവർ ഫിനിഷ് സ്കിഡ് പ്ലേറ്റും. ഇത്രയുമാണ് മുൻവശത്തെ ഡിസൈൻ സവിശേഷതകൾ. വശക്കാഴ്ചയിൽ പിയാനോ ബ്ലാക് ഫിനിഷിലുള്ള വലിയ വീൽ ആർച്ചുകളും ക്ലാഡിങ്ങുകളും മാസ് ലുക്ക് കൂട്ടുന്നു. 19 ഇഞ്ച് വീലുകളാണ് ടോപ് വേരിയന്റിൽ.