മക്കളുടെ കൈ പിടിച്ച്...

മക്കളുടെ കല്യാണത്തെ കുറിച്ച് അമ്മമാർ സ്വപ്നം കാണും. പക്ഷേ, ഈ അമ്മമാരുടെ വിവാഹം നടത്തിയതു മക്കളാണ്

- രൂപാ ദയാബ്ജി

അച്ഛന്റെയും അമ്മയുടെയും കല്യാണ ആൽബം മറിച്ചുനോക്കി എല്ലാ മക്കളും കരയും,ങ്ഹീ...ഇതിൽ ഞാനില്ലല്ലോ. എന്നാൽ അച്ഛന്റെയും അമ്മയുടെയും കല്യാണ ആൽബത്തിൽ ഉൾപ്പെടാനുള്ള ഭാഗ്യം കിട്ടിയ മക്കളെകുറിച്ചാണ് ഇവിടെ പറയുന്നത്.

വിവാഹമോചനവും രണ്ടാം വിവാഹവുമൊക്കെ ഇന്നു സർവ സാധാരണമാണ്. പക്ഷേ, അതൊക്കെ ‘വലിയ പ്രശ്നമായിരുന്ന ഒരു കാലമുണ്ട്.

വിവാഹം കഠിനമാണെങ്കിലും എല്ലാം സഹിച്ചു മിണ്ടാതെ തള്ളിനീക്കുന്ന കാലം. പരാജയപ്പെട്ട വിവാഹത്തിന്റെ കയ്പുനീർ കുടിച്ചു ജീവിതകാലം മുഴുവൻ ഒറ്റയ്ക്കു കഴിയുന്നവരുടെ കാലം.

ആ കാലത്തിൽ നിന്ന് ഇറങ്ങിവന്നു സന്തോഷത്തിന്റെ കൈപിടിച്ച രണ്ട് അമ്മമാരുടെ കഥയാണ് ഇവിടെ പറയുന്നത്. ഈ അമ്മമാരുടെ സന്തോഷത്തിന് ഇരട്ടിമധുരം പകരുന്ന ഒരു കാര്യമെന്താണെന്നോ ? മക്കൾ തന്നെയാണ് ഈ അമ്മമാരോടു ചോദിച്ചത് എന്തിനാണി സങ്കട ജീവിതം സഹിക്കുന്നത്? അമ്മയ്ക്കും വേണ്ടേ സന്തോഷമുള്ള ഒരു ലോകം ? മക്കൾ അമ്മ കല്യാണം ആലോചിച്ചു തുടങ്ങിയപ്പോൾ മുതിർന്ന തലമുറ മൂക്കിൽ വിരൽ വച്ചു. പക്ഷേ, ആ ചിന്ത ഞങ്ങൾക്ക് ഇല്ലേയില്ല എന്ന് ഈ മക്കൾ ഒരേ സ്വരത്തിൽ പറയുന്നു. അതാണു ചിന്താഗതിയിലെ തലമുറ മാറ്റം.

ഈ പ്രായത്തിൽ വീണ്ടും കല്യാണം കഴിക്കുന്നോ എന്ന നെഗറ്റിവ് കമന്റുകളെ മൈൻഡ് ചെയ്യാതെ അമ്മയെ വധുവായി വിവാഹ പന്തലിലേക്കു കൈപിടിച്ച മക്കൾ പറയുന്നു, ഹാപ്പി മദേഴ്സ് ഡേ അമ്മേ... ബീ ഹാപ്പി...

അമ്മ പറഞ്ഞു. യെസ്...ബൈക്ക് വിറ്റു മക്കൾ

ബുദ്ധി ഉറച്ചുതുടങ്ങിയ പ്രായത്തിൽ മക്കൾ ശാന്തിയോടു ചോദിച്ചു, എന്തിനാണ് ഇങ്ങനെ കഷ്ടപ്പെടുന്നത്. തനിച്ചു ജീവിച്ചാൽ ഇതിലും സന്തോഷമുണ്ടാകില്ലേ. മകളുടെ വിവാഹം കഴിഞ്ഞ ദിവസം രാത്രി ശാന്തി ആ തീരുമാനമെടുത്തു, ഇനി ജീവിതം ഒറ്റയ്ക്കു മതി.

നാലു വർഷത്തിനിപ്പുറം ശാന്തിയുടെ മക്കൾ ഗായത്രിയും ഋഷികേശും മരുമകൻ മനുവും കൊച്ചുമകൾ ശ്രേഷ്യും കൂടി മൂകാംബികയിലേക്കു വണ്ടി കയറി, അമ്മയുടെ വിവാഹം കൂടാൻ അമ്മയുടെ ജീവിതത്തിന്റെ രണ്ടാമദ്ധ്യായത്തിനു സന്തോഷം എന്ന പേര് എഴുതിച്ചേർത്ത ഗായത്രിയുടെയും ഋഷികേശിന്റെയും സന്തോഷം കേൾക്കാം.

ആത്മസംഘർഷങ്ങളുടെ കാലം

കോട്ടയം തിരുവല്ലക്കാരിയായ ശാന്തിയുടെ ആദ്യവിവാഹം 19-ാ ം വയസിലായിരുന്നു. നഴ്സിങ് പഠനം പൂർത്തിയാക്കി ആയുർവേദ പരിശീലനം നടത്തുകയായിരുന്ന ശാന്തിക്ക് ആദ്യവർഷം തന്നെ മകളും നാലു വർഷത്തിനു ശേഷം മകനും ജനിച്ചു.