വിവ ഇൽ പാപ്പ

ലോകമെമ്പാടുമുള്ള വിശ്വാസികളുടെ മനസ്സിൽ കുളിർമഴയായി പെയ്ത പാപ്പയുടെ മടങ്ങിവരവും അതു നൽകുന്ന പ്രത്യാശയും

- ഫാ. ജോസഫ് ഈറ്റോലിൽ, വത്തിക്കാൻ ഫോട്ടോ: മനോരമ ആർക്കൈവ്സ്

ഇക്കഴിഞ്ഞ ഫെബ്രുവരി പതിന്നാലിനു വൈകുന്നേരം റോമിലെ ജെമെല്ലി ആശുപത്രിയുടെ വാതിൽക്കൽ ചുവന്ന റോസാപ്പൂക്കളും സുഗന്ധമുള്ള തിരികളും കുന്നുകൂടി.

ആ പ്രണയദിനത്തിൽ കമിതാക്കൾ കൈമാറിയ റോസാപൂക്കളായിരുന്നില്ല. അതു വിശ്വാസത്തിന്റെ പൂക്കളായിരുന്നു. അന്നായിരുന്നു ആഗോള കത്തോലിക്കാ സഭയുടെ പരമാധ്യക്ഷൻ പരിശുദ്ധ പിതാവ് ഫ്രാൻസിസ് പാപ്പ രോഗാതുരനായി ആശുപത്രിയിൽ പ്രവേശിപ്പിക്കപ്പെട്ടത്. മാർപാപ്പയുടെ ആരോഗ്യാവസ്ഥ എന്നറിഞ്ഞ വിശ്വാസികൾ പാപ്പയ്ക്കു ഗുരുതരമാണ് വേണ്ടി പ്രാർ ഥിക്കാൻ ആശുപത്രിക്കു മുന്നിൽ ഒത്തുചേർന്നു. പ്രാർഥനാ സമയത്ത് അവർ സുഗന്ധമുള്ള തിരികൾ കത്തിക്കുകയും അവിടെയുള്ള വിശുദ്ധ ജോൺ പോൾ രണ്ടാമൻ പാപ്പയുടെ രൂപത്തിനു മുന്നിൽ തങ്ങൾ കൊണ്ടു വന്ന പൂക്കൾ അർപ്പിക്കുകയും ചെയ്തു.

പാപ്പയുടെ ആശുപത്രി വാർത്ത ലോകമെങ്ങും കാട്ടുതീ പോലെ പടർന്നു. പ്രാർഥനയുടെ കരങ്ങൾ ഭൂ ഗോളത്തിൽ നിന്നുയർന്നു. ആ പ്രാർഥനയുടെ കൂടി ഫലമാവണം പാപ്പ മെല്ലെ ജീവിതത്തിലേക്കു തിരിച്ചു വന്നു. ഇതെഴുതുമ്പോൾ പാപ്പ ആശുപത്രി വിട്ട് തന്റെ ഔദ്യോഗികവസതിയിലേക്കു മാറിയിരിക്കുന്നു.

ആകാശമായ് ഇരുണ്ടു തെളിഞ്ഞ്

ഇരുപത്തിയൊന്നാം വയസ്സിലാണു പാപ്പ ആദ്യമായി മരണത്തിന്റെ കാലൊച്ച കേട്ടത്. അന്ന് ഗുരുതരമായ അണുബാധയെത്തുടർന്ന് പാപ്പയുടെ ശ്വാസകോശത്തിന്റെ ഒരുഭാഗം നീക്കം ചെയ്തു. അതിനുശേഷം പല സമയത്തും പാപ്പ രോഗബാധിതനായിട്ടുണ്ട്. അപ്പോഴൊക്കെ ദൈവത്തിന്റെ കരങ്ങളിൽ അദ്ദേഹം സുരക്ഷിതനായിരുന്നു.

കഴിഞ്ഞ വർഷവും ഇതുപോലെ ശൈത്യകാലത്തിന്റെ അവസാനം കടുത്ത ബ്രോങ്കൈറ്റിസ് മൂലം മൂന്നു ദിവസം പാപ്പ ആശുപത്രിയിലായിരുന്നു. ഈ വർഷവും ശ്വാസകോശസംബന്ധമായ ബുദ്ധിമുട്ടുകളാണ് അദ്ദേഹം നേരിട്ടത്. ന്യുമോണിയ ബാധിതനായ അദ്ദേഹത്തിന്റെ ആശുപത്രി വാസം ഗുരുതരമായ ആരോഗ്യപ്രശ്നങ്ങളെ അഭിമുഖീകരിച്ചാണു മുന്നോട്ടു പോയത്.

ആശുപത്രിയിൽ പ്രവേശിപ്പിച്ച സമയത്തു തന്നെ പാപ്പയുടെ സ്ഥിതി അതീവഗുരുതരമാണെന്നും നീണ്ട കാലത്തെ ആശുപത്രിവാസം വേണ്ടിവരുമെന്നും ഡോക്ടർമാർ അഭിപ്രായപ്പെട്ടിരുന്നു. നെഞ്ചിന്റെ എക്സ്റേയിൽ നിന്ന് പോളി മൈക്രോബിയൻ ഇൻഫക്ഷൻ മുലമുള്ള ന്യുമോണിയ ആണെന്നും ആരോഗ്യം മോശം അവസ്ഥയിൽ ആണെന്നും സ്ഥിരീകരിച്ചു.