പകർത്തി എഴുതി ബൈബിൾ

60കാരി ലൂസി മാത്യു ബൈബിൾ തുറക്കുമ്പോൾ മുന്നിൽ തെളിയുന്ന അക്ഷരങ്ങളിൽ ആത്മസമർപ്പണത്തിന്റെ തിളക്കമുണ്ട്

- രൂപാ ദയാബ്ജി

സർവജ്ഞാനവും കർത്താവിൽ നിന്നു വരുന്നു. അത് എന്നേക്കും അവിടുത്തോടു കൂടെയാണ്. ബൈബിൾ പഴയ നിയമത്തിലെ പ്രഭാഷകൻ ഒന്നാം അധ്യായത്തിലേതാണ് ഈ വചനം. അതെഴുതുമ്പോൾ ലൂസിയമ്മയുടെ വിരലുകളിലൂടെ ഒരു ദൈവനിയോഗം അക്ഷരങ്ങളായി ഒഴുകിത്തുടങ്ങുകയായിരുന്നു. ആ നിയോഗം ലൂസിയമ്മ പൂർത്തിയാക്കിയപ്പോൾ അഞ്ചു പുസ്തകങ്ങളിലായി നാലായിരത്തിലേറെ പേജുകളിൽ നിറഞ്ഞ ദൈവഭക്തിയായി അതു മാറി.

സമ്പൂർണ ബൈബിളും ബൈബിളിന്റെ ഇംഗ്ലീഷ് പരിഭാഷയുമൊക്കെയായി നാലു വർഷം കൊണ്ടു ലൂസി മാത്യു കയ്യെഴുത്തു പ്രതിയാക്കിയത് അഞ്ചു വിശ്വാസ പുസ്തകങ്ങളാണ്. കോട്ടയം പാലാ രൂപതയിലെ കാഞ്ഞിരമറ്റം പള്ളിയോടു ചേർന്നുള്ള വീട്ടിലിരുന്നു ലൂസിയമ്മ ആ ദിവസങ്ങൾ ഓർത്തെടുത്തതിങ്ങനെ, “പള്ളിയിലെ ലോഗോസ് ബൈബിൾ ക്വിസ്സ് മത്സരത്തിനു വേണ്ടിയാണ് ആദ്യമായി ദൈവവചനം എഴുതി പഠിക്കാൻ തുടങ്ങിയത്. ആ എഴുത്തു പിന്നെ നിർത്താനാകാത്ത ആനന്ദമായി മാറി.

ഓരോ പേജ് എഴുതുമ്പോഴും വീണ്ടും വീണ്ടുമെഴുതാൻ മനസ്സു വെമ്പൽ കൊള്ളും...'' പ്രമറി സ്കൂൾ അധ്യാപികയായി ദീർഘകാലം ജോലിചെയ്ത ലൂസി മാത്യു റിട്ടയർമെന്റു കാലത്താണു ബൈബിൾ കയ്യെഴുത്തു പ്രതിയായി എഴുതി തീർത്തത്. വിശ്രമജീവിതത്തിൽ ഏറ്റവും സന്തോഷമുള്ള കാര്യത്തിനായിറങ്ങിയ വിശ്വാസവും അർപണവും ഇഴചേർന്ന ആ കഥ കേൾക്കാം.

ജീവിതത്തിന്റെ വഴി

മൂവാറ്റുപുഴയിലെ ആവോലിയിലാണു ലൂസി മാത്യു എന്ന ലൂസിയമ്മ ജനിച്ചതും വളർന്നതും. അപ്ൻ മത്തായി കൃഷിക്കാരനായിരുന്നു. അമ്മ ത്രേസ്യയും ഏഴുമക്കളുമടങ്ങുന്ന കുടുംബം. ആനിക്കാട് സെന്റ് സെബാസ്റ്റ്യൻസ് പള്ളിയിലായിരുന്നു ലൂസിയമ്മയുടെ മാമ്മോദീസയും ആദ്യ കുർബാനയുമൊക്കെ.

“സൺഡേ സ്കൂളിൽ പോകാൻ അന്നു വലിയ ഉത്സാഹമായിരുന്നു. ക്രിസ്മസ് കാലത്ത് എന്നും പള്ളിയിൽ പോകും. പാടത്തു കൂടി നടന്നാണു പള്ളിയിലേക്കു പോകുക. നെല്ലു വിളഞ്ഞു വരമ്പിലേക്കു മറിഞ്ഞുകിടക്കുന്നുണ്ടാകും. ഡിസംബറിലെ മഞ്ഞുവീണു നനഞ്ഞ നെൽക്കതിരിൽ മുട്ടിയാൽ പാവാടയൊക്കെ നനയും. അതു പരിഹരിക്കാനായി പള്ളിയിലേക്കു പോകുമ്പോൾ നീളനൊരു കോലു കരുതും. നെല്ലു വകഞ്ഞു മാറ്റി വഴി തെളിച്ചുള്ള ആ യാത്രയൊക്കെ ഇപ്പോഴും ഓർക്കുമ്പോൾ നല്ല രസമാണ്.