പുടവയുടുത്ത് പൊന്നോണം

കസവും കരയും വർണചിത്രങ്ങളും ചേർത്ത് ഓണപ്പുടവയുടെ മാറ്റുകൂട്ടുന്ന കുത്താമ്പുള്ളിയിലേക്ക് ഒരു യാത്ര

- രാഖി റാസ്

ചിങ്ങവെയിൽ ഇലകളിലും പൂക്കളിലും കസവെഴുതുമ്പോഴേ മലയാളമനസ്സ് ഓണക്കോടി തേടിത്തുടങ്ങും. ഗ്രാമങ്ങളിലെയും നഗരങ്ങളിലെയും ചെറുതും വലുതുമായ ടെക്സ്റ്റയിൽ ഷോപ്പുകൾ മുതൽ ബുട്ടീക്കുകളും ഷോപ്പിങ് മാളുകളും വരെ കസവു പുടവയിലെ കരവിരുതുമായി ഒരുങ്ങി നിൽക്കും. കഴിഞ്ഞ കൊല്ലത്തേക്കാൾ കൗതുകമുണർത്തുന്ന ഓണക്കോടികളിലായിരിക്കും ഓരോ മലയാളി പെൺകൊടിമാരുടെയും കണ്ണ്.

ഓണക്കോടികൾക്കായി മലയാളികൾ നാടോടിത്തുടങ്ങുമ്പോൾ കുത്താമ്പുള്ളി ഗ്രാമം അൽപം നടു നിവർക്കും. “ഒരു കൊല്ലം രാപ്പകലില്ലാതെ അധ്വാനിച്ചു നിറച്ച ഞങ്ങളുടെ റാക്കുകൾ ഒഴിയുന്ന കാലമാണിത്. ഓണം കഴിയുമ്പോൾ മുതലാണ് ഇവിടെ കോടി നെയ്ത്ത് ആരംഭിക്കുന്നത്. അടുത്ത ഓണത്തോടെ തിരക്കൊഴിയും '' കുത്താബുള്ളിയിലെ നെയ്ത്തുകാർ നാട്ടുപ്പെരുമയിലേക്കുള്ള വാതിൽ തുറന്നു.

ഗായത്രിക്കും നിളയ്ക്കുമിടയിൽ

തൃശൂർ ജില്ലയുടെ അതിർത്തി ഗ്രാമമാണ് കുത്താമ്പുള്ളി. തൃശൂരിൽ നിന്ന് 50 കിലോമീറ്ററോളം ദൂരം പ്രകൃതിമനോഹരമായ പാതകളിലൂടെ സഞ്ചരിച്ച് കുതിരാൻ തുരങ്കം കടന്ന് തിരുവില്വാമലയിലെത്താം. അവിടെ നിന്ന് അഞ്ചു കിലോമീറ്റർ കൂടി അകത്തേക്ക് മാറിയാണ് കുത്താമ്പുള്ളി ഗ്രാമം.

ഗ്രാമാതിർത്തി അടുക്കുമ്പോഴേ അറിയാം കുത്താമ്പുള്ളി എത്തി എന്ന്. വഴിവക്കിലെ ഓരോ കൊച്ചു വീടുകളിലും കച്ചവടസ്ഥാപനത്തിലെന്നതു പോലെ കൈത്തറി വസ്ത്രങ്ങൾ എന്ന ബോർഡുകൾ തൂങ്ങുന്നുണ്ടാകും. ഓരോ വീട്ടിലും തറിയുടെ താളം ഉയരുന്നുണ്ടാകും. തറിയുള്ള വീട്ടുകാരെല്ലാം വസ്ത്രം നെയ്ത് സഹകരണ സംഘം വഴിയോ സ്വകാര്യ സംരംഭകർ വഴിയോ വിപണനം ചെയ്യുകയാണ് പതിവ്. നെയ്ത്തുകാർ തന്നെയാണ് സ്വകാര്യസംരംഭകരായി മാറിയിരിക്കുന്നത്.