എന്റെ ലോകം മാറ്റിയ മെസ്സി

മെസ്സിയുടെ വേർപാടുമായി പൊരുത്തപ്പെടാനുള്ള ശ്രമങ്ങൾക്കിടെയാണ് പാർവതി ജയറാമിന്റെ ജീവിതത്തിലേക്ക് പുതിയ അതിഥി വിരുന്നെത്തിയത്

- അഞ്ജലി അനിൽകുമാർ

പെട്ടെന്നൊരു ദിവസം എന്റെ ജീവിതത്തിലേക്കു കടന്നു വന്നതാണു മെസ്സി. അതു വരെ ഒരു നായ്ക്കുട്ടിയെ സ്നേഹിക്കുമെന്നോ ഓമനിച്ചു വളർത്തുമെന്നോ സ്വപ്നം പോലും കണ്ടിരുന്നില്ല. പക്ഷേ, അവന്റെ വരവോടെ എന്റെ ലോകം അപ്പാടെ മാറി. മെസ്സി ഞങ്ങളുടെ വീട്ടിലെ അംഗമായിരുന്നു.

ദാ, ഈ കളിപ്പാട്ടങ്ങളൊക്കെ മെസ്സിയുടേതാണ്. ഈ കോളറിൽ അവന്റെ പേരെഴുതിയിട്ടുണ്ട്. ഇതൊന്നും മറ്റാരും തൊടുന്നത് ഇഷ്ടമല്ലായിരുന്നു. അവൻ പോയതിനുശേഷം ഞാൻ എല്ലാമെടുത്തു സൂക്ഷിച്ചു വച്ചു. പാർവതിയുടെ കൺകോണിൽ മെസ്സിയുടെ ഓർമകൾ തിളങ്ങി.

കളിപ്പാട്ടങ്ങൾ സൂക്ഷിക്കുന്ന കബോർഡിനരികിൽ, പൂന്തോട്ടത്തിൽ, ലിവിങ് റൂമിലെ ഒഴിഞ്ഞ കോണിൽ തുടങ്ങി മെസ്സിയുടെ നോട്ടങ്ങളും കുറുമ്പുകളും ശ്വാസവും നിശബ്ദമായി നിറയുന്ന ഇടങ്ങൾ ഒരുപാടുണ്ട് പാർവതിയുടേയും ജയറാമിന്റെയും ചെന്നൈയിലെ വീട്ടിൽ.

ഒരു പിറന്നാൾ സമ്മാനം

“ചക്കിയുടെ 20-ാം പിറന്നാളിന് ഇംഗ്ലിഷ് റിട്രീവറിനെ സമ്മാനമായി നൽകണമെന്നു ഞാനും ജയറാമും തീരുമാനിച്ചിരുന്നു. ഒരുപാട് പപ്പീസിന്റെ ഫോട്ടോ കണ്ടെങ്കിലും ആരും മനസ്സിലേക്കു കയറിയില്ല. പക്ഷേ, മെസ്സിയുടെ ഫോട്ടോ കണ്ടപ്പോഴേ ഇവൻ നമ്മുടെ വീട്ടിലേക്കു വരേണ്ട കുട്ടിയാണ് എന്നെനിക്കു തോന്നി.

ബർത്ത് ഡേ ദിവസം മനോഹരമായി അലങ്കരിച്ച ബാസ്ക്കറ്റിലിരുത്തിയാണു കണ്ണൻ (കാളിദാസ്) മെസ്സിയെ കൊണ്ടുവന്നത്. അന്നവന് 39 ദിവസം പ്രായമേയുള്ളൂ. പുതിയ ഇടം കണ്ടപാടെയുള്ള അവന്റെ നോട്ടവും തുള്ളിച്ചാടിയുള്ള നടത്തവും ഇന്നും മനസ്സിലുണ്ട്.'' പാർവതിയുടെ വാക്കുകളിൽ ഓടിച്ചാടി വരുന്നു, മെസ്സി.