ആഹാരവും അമിതവണ്ണവും

ഭാരക്കൂടുതൽ എങ്ങനെ മനസ്സിലാക്കാമെന്നതിന് കുറുക്ക് വഴിയിതാ

- എസ്.എം

ആഹാരനിയന്ത്രണത്തിലൂടെ അമിതവണ്ണം കുറയ്ക്കാനാകും. ഇന്നത്തെക്കാലത്ത് സൗന്ദര്യത്തിന് ശാപമായി മാറിയിരിക്കുകയാണ് അമിതവണ്ണം. വണ്ണം കൂടിയിട്ട് പശ്ചാത്തപിച്ചിട്ട് എന്താണ് കാര്യം? നിങ്ങളുടെ ശരീരത്തിൽ ഭാരക്കൂടുതലാണെന്ന തിരിച്ചറിവാണ് ആദ്യം വേണ്ടത്. ഭാരക്കൂടുതൽ എങ്ങനെ മനസ്സിലാക്കാമെന്നതിന് കുറുക്ക് വഴിയിതാ. നിങ്ങളുടെ ഉയ രവും ശരീരഭാരവും അളന്ന് നോക്കുക. ഉദാഹരണത്തിന് നിങ്ങളുടെ ഉയരം 155 സെ.മീ ആണെന്ന് കരുതുക. നിങ്ങളുടെ ഭാരം 55 കിലോയിൽ അധികമാണെങ്കിൽ ശരീരത്തിന് ദാനം കൂടുതലാണെന്ന് മനസ്സിലാക്കണം. ശരീര ഭാരത്തിന് പ്രധാന കാരണം കൊഴുപ്പാണ്. ഒരു കിലോഗ്രാം കൊഴുപ്പ് ഏകദേശം 7600 കലോറി ഊർജ്ജത്തിന് തുല്യമാണ്. ഈ കണക്കനുസരിച്ച് 38 ദിവസവും നടക്കുകയും അതിനോടൊപ്പം ഭക്ഷണം ക്രമീകരിക്കുകയും ചെയ്താൽ ഒരു കിലോഭാരം കുറയ്ക്കാം. രണ്ടോ മൂന്നോ ദിവസം നടന്നുകഴിഞ്ഞ് ഭാരം കുറയുന്നില്ലെന്ന് പരാതി പറയുന്നവർ ഇത് മനസ്സിലാക്കുക. ഭാരം കൂടുന്നതു പോലെ എളുപ്പമല്ല അത് കുറയ്ക്കാൻ. ശരീരഭാരം കുറയ്ക്കാൻ മറ്റുള്ളവരുടെ പ്രേരണ മാത്രം പോരാ. നിങ്ങളുടെ ഭാഗത്ത് നിന്ന് അതിന് ദൃഢനിശ്ചയം വേണം.

കലോറി മൂല്യം കൂടുതലുള്ള ഭക്ഷണം ഒഴിവാക്കുക. എണ്ണയിൽ വറുത്ത ലഘുഭക്ഷണവും മാംസാഹാരം, മധുരം കൂടുതലുള്ള ഐസ്ക്രീം, ചിക്കൻ ഫ്രൈ, ബേക്കറി പലഹാരങ്ങൾ എന്നിവ മുന്നിലിരിക്കുമ്പോൾ എങ്ങനെയാണ് കണ്ടില്ലെന്ന് നടിക്കുക. അല്ലേ?