38 மாவட்டங்களில் முதல்வரால் நடப்போம் நலம் பெறுவோம் 2.0 விரைவில் தொடங்கி வைக்கப்பட உள்ளது: அமைச்சர் மா.சுப்பிரமணியன் பேச்சு

நாமக்கல் (தெற்கு) அரசு மேல்நிலைப்பள்ளியில் இன்று மருத்துவம் மற்றும் மக்கள் நல்வாழ்வுத் துறை அமைச்சர் மா.சுப்பிரமணியன் நடப்போம் நலம் பெறுவோம் சுகாதார நடைபாதை திட்டத்தின் கீழ், மாவட்ட ஆட்சித்தலைவர் உமா தலைமையில், நாமக்கல் சட்டமன்ற உறுப்பினர் ராமலிங்கம், மாவட்ட காவல் கண்காணிப்பாளர் ராஜேஸ் கண்ணன் ஆகியோர் முன்னிலையில் பொதுமக்களுடன் 8 கி.மீ தூரம் நடை பயிற்சியினை மேற்கொண்டார்.

- 

பின்னர் அமைச்சர் தெரிவித்ததாவது, தமிழ்நாடு முதலமைச்சர் வழிகாட்டுதலோடு, ஜப்பான் நாட்டில் உள்ள ஜப்பான் பன்னாட்டு முகமையில் ஜப்பான் நிதி ஆதாரம் குறித்து கருத்துகளை கேட்டு பெறுவதற்காக தமிழ்நாடு சுகாதாரத்துறை அலுவலர்களுடன் டோக்கியோவிற்கு சென்றிருந்தோம். டோக்கியோவில் 8 கி.மீ தூரத்திற்கான நடைபாதை ஹெல்த் வாக் என்ற பெயரில் வடிவமைக்கப்பட்டிருந்தன. சாலைகளில் இருபுறங்களிலும் மரங்கள் நடப்பட்டு, இருக்கைகள் அமைத்து, நடப்பதனால் கிடைக்கும் நன்மைகள் குறித்து எடுத்துரைக்கும் வகையில் விளம்பர பலகைகளுடன் நடைபாதை அமைக்கப்பட்டுள்ளது. தமிழ்நாட்டில் உள்ள அனைத்து மாவட்டங்களிலும் முதலமைச்சரால் தொடங்கி வைக்கப்பட்டு, தமிழ்நாடு முழுவதும் இத்திட்டம் மிகச்சிறப்பாக நடைமுறைப்படுத்தப்பட்டு வருகின்றன.