தவெக எம்எல்ஏவிடம் பேரம்: 3 பேர் கைது

தவெக ஆட்சிக்கு எதிராக செயல்பட வைக்கும் நோக்கத்தில், அக்கட்சியின் ஊத்தங்கரை தொகுதி எம்எல்ஏ என். இளையராஜாவிடம் பேரம் பேசியதாக யூடியூபர் உட்பட 3 பேர் கைது செய்யப்பட்டனர்.

- 

இந்த பேரத்தில் முன்னாள் திமுக அமைச்சர் செந்தில் பாலாஜியின் சகோதரருக்கு தொடர்பு உள்ளதாக காவல் துறையினர் வழக்குப் பதிவு செய்து தீவிர விசாரணை நடத்தி வருகின்றனர்.

தமிழகத்தில் கடந்த மே மாதம் நடந்த சட்டப்பேரவைத் தேர்தலில் ஜோசப் விஜய்யின் தமிழக வெற்றிக் கழகம் 108 இடங்களில் வெற்றி பெற்றது. திமுக கூட்டணி 73 இடங்களையும், அதிமுக கூட்டணி 53 இடங்களையும் கைப்பற்றியது. எந்தக் கூட்டணிக்கும் தனிப்பெரும்பான்மை கிடைக்காததால் ஆட்சி அமைப்பதில் இழுபறி நீடித்தது. இதையடுத்து, திமுக கூட்டணியில் இருந்து விலகிய காங்கிரஸ், தவெகவுக்கு ஆதரவு தெரிவித்தது. இதைத் தொடர்ந்து, திமுக கூட்டணியில் இருந்த இடதுசாரிகள், ஐயூஎம்எல், விசிக ஆகிய கட்சிகளும் விஜய் ஆட்சி அமைக்க ஆதரவு தெரிவித்ததால் தவெக ஆட்சி அமைத்தது.

தவெக எம்எல்ஏவிடம் பேரம்:

இந்நிலையில் கிருஷ்ணகிரி மாவட்டம், ஊத்தங்கரை தொகுதி தவெக எம்எல்ஏ என். இளையராஜா, சென்னை பெருநகர காவல் துறை ஆணையர் ஏ. அமல்ராஜிடம் கடந்த 29-ஆம் தேதி ஒரு புகார் மனு அளித்தார். அதில், 'தன்னை கைப்பேசி மூலம் சில நாள்களுக்கு முன்பு சென்னை அரும்பாக்கத்தைச் சேர்ந்த யூடியூபரும், அரசியல் கருத்துக் கணிப்பு நிறுவனம் நடத்தி வருபவருமான திருநாவுக்கரசு, தமிழகத்தில் உள்ள ஒரு முக்கிய கட்சியைச் சேர்ந்த சிலர் கேட்டுக் கொண்டதன்பேரில் தொடர்பு கொள்வதாகவும், நேரில் சந்திக்க வேண்டும் என்றும் கூறினார்.