உயிரிழப்புக்குக் காரணமான இருமல் மருந்து ஏற்றுமதி செய்யப்படவில்லை

சர்ச்சைக்குள்ளான மருந்துகள் ஏற்றுமதி செய்யப்படவில்லை

- 

'மத்திய பிரதேசத்தில் குழந்தைகள் உயிரிழப்புக்கு காரணமான இருமல் மருந்துகள் வேறு எந்த நாட்டுக்கும் ஏற்றுமதி செய்யப்படவில்லை' என்று உலக சுகாதார அமைப்புக்கு (டபிள்யுஹெச்ஓ) இந்தியா தரப்பில் வியாழக்கிழமை பதிலளிக்கப்பட்டது.

மேலும், 'கோல்ட்ரிஃப்', 'ரெஸ்பிஃபிரஷ் டிஆர்', 'ரீலைஃப்' ஆகிய மூன்று இருமல் மருந்துகள் முழுமையாகத் திரும்பப் பெறப்பட்டுள்ளதோடு, அவற்றின் உற்பத்தியை உடனடியாக நிறுத்துமாறு உற்பத்தி நிறுவனங்களுக்கு உத்தரவு பிறப்பிக்கப்பட்டுள்ளது என்றும் இந்தியா தரப்பில் விளக்கம் அளிக்கப்பட்டது.

பிற நாடுகளுக்கு ஏற்றுமதி செய்யப்பட்டதா?:

'குழந்தைகள் உயிரிழப்புக்குக் காரணமான இந்த ரசாயனம் கலந்த இருமல் மருந்து பிற நாடுகளுக்கு ஏற்றுமதி செய்யப்பட்டதா என்பது குறித்து விளக்கம் அளிக்குமாறு இந்திய அதிகாரிகளை உலக சுகாதார அமைப்பு புதன்கிழமை கேட்டுக் கொண்டது.

இதுகுறித்து உலக சுகாதார அமைப்பு வெளியிட்ட செய்திக் குறிப்பில், 'மத்திய பிரதேச மாநிலத்தில் உள்ள உஜ்ஜைன், இந்தூர் மாவட்டங்களில் 6 குழந்தைகள் உயிரிழந்துள்ளன. இந்த உயிரிழப்புக்கு இருமல் மருந்து காரணமாக இருக்கலாம் என சந்தேகம் எழுந்துள்ளது. இதுதொடர்பாக அதிகாரபூர்வ தகவல் இன்னும் கிடைக்கவில்லை' என்று தெரிவித்தது.