લગ્નસ્થળની સજાવટમાં ભળ્યો પ્રકૃતિપ્રેમ

ઝગમગ રોશની, નેત્રદીપક સજાવટ અને ચટાકેદાર ભોજન પીરસતો ડાઈનિંગ એરિયા..આવા મનોહર માહોલમાં નવયુગલ નવજીવનની શરૂઆત કરે.. પણ જો આ બધું જ કુદરતી અથવા ઝીરો વેસ્ટ ફ્રી હોય તો? હા, તાજેતરમાં અમદાવાદમાં યોજાઈ ગયેલાં લગ્ન એની પર્યાવરણપ્રેમી સજાવટને લીધે યાદગાર બની રહ્યાં.

- મહેશ શાહ (અમદાવાદ)

પ્રિ-વેડિંગ ઈવેન્ટ્સ, લગ્ન અને રિસેપ્શન.. આ ત્રણેય પ્રસંગની શાનદાર ઉજવણી કરવી સૌને ગમે. આમાં મહત્ત્વની ભૂમિકા ભજવે લગ્નસ્થળ. એ બૅન્ક્વે હૉલ હોય, શાનદાર પાર્ટી પ્લૉટ હોય અથવા ફાર્મ હાઉસ કે વિશાળ બંગલો. અતિથિની પહેલી નજરે પ્રવેશદ્વારથી સ્ટેજ સુધીની સજાવટ ચડેઃ ક્યાંક રંગીન કાપડ તો ક્યાંક ખુશ્બદાર અસલી કે આર્ટિફિશિયલ ફૂલ, લાકડાંની કળાત્મક કોતરણી કે વૈવિધ્યપૂર્ણ કળાત્મક શિલ્પ. એમ તો ધનાઢ્ય અને શોખીન મોભી રાજમહેલ સમી કે થીમ બેઝ્ડ સજાવટ પણ કરાવે.

તાજેતરમાં અમદાવાદમાં જરા હટકે કહેવાય એવી સજાવટ જોવા મળી. જાણીતા ઉદ્યોગપતિ વિરલભાઈએ પોતાની વહાલસોયી દીકરી પોરવીનાં (બન્ને નામ બદલ્યાં છે) લગ્ન પોતાના વિશાળ બંગલામાં યોજ્યાં. બંગલાના પરિસરમાં, બગીચામાં અઢળક વૃક્ષો, ફૂલ, છોડ છે એટલે પ્રસંગ ઊજવવા નૅચરલ નજારો કુદરતી જ મળી રહે.

જો કે વિરલભાઈને પ્રાકૃતિક માહોલ સંગે કશુંક નવતર ખપતું હતું, જેની જવાબદારી એમણે અમદાવાદની ઈવેન્ટ કંપની વેડિંગ અમ્બ્રેલાના રાજેશ રવાણીને સોંપી એટલે રાજેશભાઈએ સવા બે દાયકાનો અનુભવ કામે લગાડી એવી સજાવટ કરી કે યજમાન-મહેમાન-સાજનમાજન સૌએ વખાણી. પ્રસંગ દીપી તો ઊઠ્યો જ, સાથે યાદગાર પણ બન્યો.