વીમાનો વિસ્તાર વધી રહ્યો છે ત્યારે..

આ ક્ષેત્રે પ્રવેશવા ઈચ્છતી કંપનીઓ માટે પ્રવેશ સરળ બનાવવા સરકાર શું વિચારે છે?

- જયેશ ચિતલિયા

કોવિડ મહામારી બાદ લોકોનાં જીવનમાં અનેક પ્રકારનાં ધરખમ પરિવર્તન આવ્યાં છે. એમાં સ્વાસ્થ્ય ક્ષેત્રનાં પરિવર્તન વિશેષ છે. કોવિડના કપરા કાળમાં હજારો લોકોએ જીવ ગુમાવ્યા અને લાખોએ નોકરી-ધંધા ગુમાવ્યાં. એ વખતે વધુ ને વધુ લોકોને બચત-રોકાણ અને ઈન્સ્યોરન્સ-ખાસ કરીને હેલ્થ ઈન્સ્યોરન્સનું મહત્ત્વ વિશેષ સમજાવા લાગ્યું. બચત-રોકાણની ચર્ચા આપણે અગાઉ કરી હોવાથી આ વખતે આપણે ઈન્સ્યોરન્સ ક્ષેત્રમાં આવી રહેલા પરિવર્તનની વાત કરીશું.

સરકારે ઈન્સ્યોરન્સ ઉદ્યોગના વધતા મહત્ત્વ અને ન્યુ-એજ કંપનીઓના પ્રવેશની શક્યતા ધ્યાનમાં લઈ આ ક્ષેત્રે સુધારા લાવવાની દિશામાં સક્રિય વિચારણા આદરી છે. નવી કંપનીઓ આ ક્ષેત્રે આવી શકે અને એનો લાભ નાના વર્ગને પણ મળે એ ઉદ્દેશ સાથે સરકાર વીમા કંપનીઓ માટેની લઘુતમ મૂડી જરૂરત રૂપિયા ૧૦૦ કરોડની કરવાનું તેમ જ માઈક્રો ઈન્સ્યોરન્સ અને ઍગ્રિકલ્ચર ઈન્સ્યોરન્સ પૉલિસીને પ્રોત્સાહન આપવાનું પણ વિચારે છે. આ ઉદ્યોગમાં સ્પર્ધા અને ઈનોવેશનની ખાસ જરૂર છે. જો આમ થાય તો ગ્રાહકોને વ્યાપક પસંદગીનો અવકાશ ખર્ચ નીચો આવે અને સ્પર્ધાથી શિસ્ત વધી શકે.

વધી રહ્યું છે સ્પેશિયલાઈઝેશન