વર્ચસ્વ અને વૈમનસ્યના વિવાદ વચ્ચે જી-૭ ભારત માટે કેવું સાબિત થશે

જી-૭ની સ્થાપના ૧૯૭૫માં થઈ હતી, જેનો હેતુ વૈશ્વિક આર્થિક મુદ્દાઓ, જેવા કે નાણાકીય કટોકટી, વેપાર-આર્થિક નીતિઓ પર ચર્ચા કરવાનો હતો

- સુધીર એસ. રાવલ

આજકાલ આંતરરાષ્ટ્રીય સ્તરે જે ઊથલપાથલ અને ઘટનાઓ આકાર લઈ રહી છે, તેનાથી દુનિયાના લગભગ તમામ દેશોમાં એક ખાસ પ્રકારની અસ્થિરતા અને ઉચાટનું વાતાવરણ જોવા મળે છે. વિશ્વને સ્પર્શતા પ્રશ્નો, નીતિઓ, વ્યવસ્થાઓ જેવી બાબતોમાં દિન-પ્રતિદિન ગૂંચવાડો સર્જાતો જતો હોવાનું ફલિત થાય છે. મહાસત્તાઓની દાદાગીરી, નેતાઓની દબંગ માનસિકતા, નાણાં અને સત્તાની નિરંકુશ રાજરમત ઉપરાંત વર્ચસ્વ અને વૈમનસ્યના જંગમાં વૈશ્વિકસ્તરે માનવતા, સભ્યતા, વિવેક, શાણપણ અને મુત્સદ્દીપણાનો રોજેરોજ કચ્ચરઘાણ થતો જોવા મળે છે. પરિણામે સમગ્ર વિશ્વમાં માનવકલ્યાણ, વિકાસ અને પ્રગતિના વિચારો, નીતિઓ કે યોજનાઓ પ્રત્યેની નિષ્ઠા અને ગંભીરતા અપ્રસ્તુત બની ગઈ છે. વૈશ્વિક સ્તરે જાતજાતનાં સંગઠનો અને સંસ્થાઓનાં માધ્યમો થકી અનેક પ્રકારનાં સંમેલનો અને શિખર સંમેલનો યોજાતાં રહેતાં હોવા છતાં દેશો-દેશો વચ્ચે ઊભરી રહેલા વિવાદોથી વર્તમાન સ્થિતિ ડામાડોળ થઈ રહી છે અને વિવિધ દેશો વચ્ચેનાં આર્થિક, સામાજિક અને રાજકીય સમીકરણોમાં ભારે ગૂંચવાડો પેદા થઈ રહ્યો છે, એવું સ્પષ્ટ દેખાય છે. અફસોસજનક બાબત એ છે કે વિશ્વમાં આ સંજોગોમાં આંગળીના વેઢે ગણી શકાય એટલા નેતાઓ પણ ક્ષિતિજે નથી જોવા મળી રહ્યા કે જેઓ તેમના ઉમદા ચારિત્ર્યબળ, પ્રભાવશાળી વ્યક્તિત્વ કે મહાનતાના જોરે વિશ્વભરના માનવસમાજમાં સુખ, શાંતિ, શાલીનતા, સભ્યતા કે સકારાત્મકતાના એજંડા પર જગતને દોરવા પ્રેરી શકે અથવા તે માટેની આશાનો સંચાર કરી શકે!

એકાવનમું જી- શિખર સંમેલન :