અમેરિકન સ્વપ્નધારકો માટે વર્ષ ૨૦૨૬

જેઓ ઇમિગ્રન્ટ વિઝાના ઇચ્છુકો હશે, જેમની અમેરિકામાં કાયમ રહેવાની ઇચ્છા હશે, એમને જો અંગ્રેજી ભાષા આવડતી ન હોય તો કદાચ એમને અમેરિકામાં કાયમ રહેવાની છૂટ આપવામાં નહીં આવે

- ડો.સુધીર શાહ

સ્વદેશ છોડીને પરદેશમાં જઈને વસવાટ કરવાનાં અનેક કારણો છે. કોઈ વ્યક્તિ એની માતૃભૂમિ ત્યજીને પરદેશ જઈને ત્યાં વસવાટ કરે, જન્મતાં એને જે સિટીઝનશિપ મળી હોય એ ત્યાગીને બીજા દેશનું નાગરિકત્વ અપનાવે એનો અર્થ એમ નથી થતો કે એ વ્યક્તિના સ્વદેશમાં અંધાધૂંધી ચાલી રહી છે.ત્યાં ઉચ્ચ શિક્ષણ પ્રાપ્ત નથી થતું. નોકરીની તકો નથી, વ્યાપાર-ધંધા ચાલતા નથી, પ્રજાનું દમન અને શોષણ થાય છે, રાજ્યકર્તાઓ પ્રજાની ફરિયાદોનું નિરાકરણ તો શું, પણ એ સાંભળવાની પણ દરકાર કરતા નથી, યા તો એ વ્યક્તિ જેણે પોતાનો દેશ છોડી દીધો છે અને અન્ય દેશને અપનાવ્યો છે એ ‘દેશદ્રોહી’ છે.

સ્થળાંતર કરવાનાં અનેક કારણો હોય છે. કોઈ અંગત વ્યક્તિ અન્ય દેશમાં રહેતી હોય, તો તમે એની જોડે રહેવા માટે તમારા દેશનો ત્યાગ કરો છો. નોકરી અર્થે પણ લોકો પરદેશમાં જઈને વસે છે. વ્યાપારનું ક્ષેત્રફળ વધારવા અનેકો પરદેશ જઈને વસે છે. ઘણા હવામાનના કારણે પણ સ્થળાંતર કરે છે. આમ જુદાં-જુદાં કારણોસર લોકો સ્થળાંતર કરે છે. કોઈ વ્યક્તિ સ્થળાંતર કરે, પોતે જ્યાં જન્મ્યો હોય એ ધરતીને છોડીને અન્ય દેશમાં જઈને વસે એટલે એ વ્યક્તિ દેશદ્રોહી બની નથી જતી. ઊલટાનું આવી વ્યક્તિઓ એમની માતૃભૂમિને વધુ પ્રેમ કરતા હોય છે. પરદેશમાં કમાઈને સ્વદેશમાં એ ધન મોકલતા હોય છે. ભારતનું હૂંડિયામણ આ કારણસર જ વૃદ્ધિ થવા પામ્યું છે.