നിരാകരണങ്ങൾ

കഥക്കൂട്ട്

- തോമസ് ജേക്കബ്

പ്രശസ്തമായ ഏറ്റവും കൂടുതൽ കൃതികൾ തിരസ്കരിച്ചിട്ടുള്ള പത്രാധിപരെന്ന പ്രശസ്തിയോ അപഖ്യാതിയോ "മാതൃഭൂമി' വാരിക പത്രാധിപർ എൻ.വി. കൃഷ്ണ വാരിയർക്കുള്ളതാണ്. മലയാളത്തിൽ ആധുനികതയുടെ തുടക്കം കുറിച്ചുകൊണ്ട് അയ്യപ്പപ്പണിക്കരെഴുതിയ "കുരുക്ഷേത്രം', ആനന്ദിന്റെ "ആൾക്കൂട്ടം', മധുസൂദനൻ നായരുടെ "നാറാണത്തുഭ്രാന്തൻ', കടമ്മനിട്ട രാമകൃഷ്ണന്റെ കിരാതനൃത്തം' എന്നിവ ഇതിൽ പെടുന്നു.

"ആൾക്കൂട്ടം' നോവലല്ല, വെറും പ്രബന്ധമാണ് എന്നായിരുന്നു എൻവിയുടെ വിമർശനം. കുരുക്ഷേത്രം അദ്ദേഹം തിരിച്ചയച്ചില്ല, പ്രസിദ്ധീകരിക്കാതെ മാറ്റി വയ്ക്കുകയായിരുന്നു. ഒടുവിൽ എം.വി. ദേവൻ മാതൃഭൂമി വിട്ടപ്പോൾ അത് എടുത്തു കൊണ്ടു പോരുകയായിരുന്നു. എൻ.പി. ചെല്ലപ്പൻ നായരും സി.എൻ. ശ്രീകണ്ഠൻ നായരും പത്രാധിപന്മാരായിരുന്ന ദേശബന്ധു വാരിക അത് 1960 സെപ്റ്റംബറിൽ വലിയ പരസ്യം നൽകി പ്രസിദ്ധീകരിച്ചു.

മാതൃഭൂമി വാരിക തിരിച്ചയച്ചതാണ് കലാമണ്ഡലം കൃഷ്ണൻ നായരുടെ ആത്മകഥയും. അയ്യപ്പപ്പണിക്കർ ഒരു നാൾ എസ്. ജയചന്ദ്രൻ നായരെ വിളിച്ചു പറഞ്ഞു, 'കൃഷ്ണൻ നായർ തിരുവനന്തപുരത്തു മാർഗിയിലുണ്ട്. അവിടെ ചെന്നാൽ ആത്മകഥ കിട്ടും.' ജയചന്ദ്രൻ നായർ കയ്യോടെ ചെന്ന് "എന്റെ ജീവിതം അരങ്ങിലും അണിയറയിലും കലാകൗമുദി'യിൽ പ്രസിദ്ധീകരിക്കുകയായിരുന്നു.