കിയയുടെ ഗോൾഡൻ കീ

പുതിയ ലുക്കും ഫീച്ചേഴ്സുമായി കാരൻസിന്റെ പരിഷ്കരിച്ച പതിപ്പ്- ക്ലാവിസ്

- നോബിൾ എം. മാത്യു

മൾട്ടിപർപ്പസ് വാഹനനിരയിലേക്ക് കാരൻസ് എത്തുമ്പോൾ മത്സരിക്കേണ്ടിയിരുന്നത് ആ രംഗത്തെ കരുത്തനായ ടൊയോട്ടയോടായിരുന്നു. സാക്ഷാൽ ഇന്നോവയോട്. മാരുതിയുടെ എർട്ടിഗ, എക്സ്എൽ സിക്സ് എന്നീ മോഡലു കൾ വേറെയും. എന്നാൽ ലേഞ്ച് ചെയ്ത് ചുരുങ്ങിയ നാളുകൾകൊണ്ട് 2 ലക്ഷം കാരൻസുകൾ നിരത്തിലെത്തി. എന്തായിരിക്കും കാരണം? മികച്ച നിർമാണ നിലവാരം, ഉള്ളിലെ സ്ഥലസൗകര്യം, മോശമല്ലാത്ത പെർഫോമൻസ് ഒപ്പം തരക്കേടില്ലാത്ത ഇന്ധനക്ഷമതയും. ഇതിനൊപ്പം മികച്ച വിൽപനാനന്തര സേവനവും. ഈ ഘടകങ്ങളാണ് കാരൻസിനു വിപണിയിൽ കുതിപ്പേകിയത്. ഇപ്പോഴിതാ ക്ലാവിസ് എന്ന കാരൻസിന്റെ ഫേസ് ലിഫ്റ്റുമായി കിയ എത്തുകയാണ്. ഗ്രീക്ക് വാക്കാണ് ക്ലാവിസ് സ്വർണ താക്കോൽ എന്നർഥം. എംപിവി സെഗ്മെന്റിൽ കിയയ്ക്ക് കിടിലൻ എൻട്രി തുറന്നു നൽകിയ കാരൻസിന്റെ പിൻഗാമി സ്വർണതാക്കോലുപയോഗിച്ച് ഈ സെഗ് മെന്റ് ആരും കടക്കാതെ തന്റേതാക്കി താഴിട്ടു പൂട്ടുമോ? നോക്കാം..

മാസ് ... മാസ് ...

ക്ലാവിസിനെ നേരിട്ടു കണ്ടമാത്രയിൽ മനസ്സിനുള്ളിൽ മന്ത്രിച്ച വാക്കുകളാണ്. മുന്നിൽ നിന്നുള്ള കാഴ്ചയിൽ കാരൻസിനു ഒരു പതിഞ്ഞ ഭാവമായിരുന്നു. എന്നാൽ ക്ലാവിസിനെ ഏത് ആംഗിളിൽനിന്നു നോക്കിയാലും മാസ് ലുക്കാണ് കിട്ടുന്നത്. നീളം വീതി ഉയരം തുടങ്ങിയ അളവുകളിൽ കാര്യമായ മാറ്റമൊന്നുമില്ല. ആകെയുള്ള ചെറിയ മാറ്റം നീളം 10 എംഎം കൂടി എന്നതാണ്. മുൻപിൻ ബംപർ ഡിസൈൻ പരിഷ്കരി ച്ചതാണ് ഇതിനു കാരണം. കാരൻസിന്റെ ബേസ് സ്ട്രക്ചർ നിലനിർത്തി മുൻവശവും പിൻഭാഗവും ഡിസൈൻ ടീം ഉടച്ചുവാർത്തെന്നു പറയാം. കാരൻസിന്റെ കെ പ്ലാറ്റ്ഫോം തന്നെയാണ് ക്ലാവിസിനും ഉയർന്ന ബോണറ്റാണ്. ബംപറിലെ സാറ്റൻ ഫിനിഷ് മെറ്റൽ പാനലും വലിയ വീൽ ആർച്ചും ഡോറിലെ ഫോക്സ് മെറ്റൽ പാനലിങ്ങും ബ്ലാക് ക്ലാഡിങ്ങുമെല്ലാം എവിയുടെ ഗെറ്റപ്പ് നൽകുന്നുണ്ട്. കിയയുടെ ഡിജിറ്റൽ ടൈഗർ ഫേസാണ് ക്ലാവിസിന്. നേർത്ത വരകൾപോലുള്ള ടേൺ ഇൻഡിക്കേറ്റർ കൂട്ടിയിണക്കിയ സ്റ്റാർ മാപ് എൽഇഡി ഡിആർഎൽ ഡിസൈൻ അതിമനോഹരം. സിറോസിൽ കണ്ടതരത്തിലുള്ള ഐസ്ക്യൂബ് ടൈപ് എംഎഫ്ആർ എൽഇഡി ഹെഡ് ലാംപാണ്. വലിയ സ്റ്റാർ മാപ് എൽഇഡി കണക്ടഡ് ടെയിൽ ലാംപാണ് പിന്നിലെ എടുപ്പ്. സ്റ്റോപ്പ് ലാംപ് റൂഫ് സ്പോ യ്ലറിൽ നൽകി. കാരൻസിനെക്കാളും ബോൾഡ് ലുക്കാണ് ക്ലാവിസിന്റെ പിൻഭാഗം നൽകുന്നത്. 17 ഇഞ്ച് അലോയ് വീലാണ്. കാരൻസിൽ 16 ഇഞ്ചായിരുന്നു.

എട്ടു നിറങ്ങളുണ്ട് ക്ലാവിസിന്. അതിൽ പുതിയ ഐവറി സിൽവർ ഗ്ലോസ് നിറം പ്രീമിയം ടച്ചുണ്ട്.