കുശാൽ നഗരത്തിലെ പൂമരം

ഷാൻഗ്രില. ടിബറ്റിലെ കുൻലൂൻ എന്ന പർവത മുത്തശ്ശിയുടെ ഹൃദയത്തിൽ മയങ്ങുന്ന മായിക സൗന്ദര്യമുള്ള സ്വപ്നഭൂമി. എങ്ങനെ ആ സ്വപ്നം എത്തിപ്പിടിക്കും? അവിടേക്കു വഴിയുണ്ടോ? വാഹനങ്ങൾ? ദൂരമെത്ര? പോകുന്ന ദൂരത്തിലേറെ പോകുമ്പോഴല്ലേ യാത്ര യാത്രയായി മാറുന്നത്...aഷാൻഗ്രില. ടിബറ്റിലെ കുൻലൂൻ എന്ന പർവത മുത്തശ്ശിയുടെ ഹൃദയത്തിൽ മയങ്ങുന്ന മായിക സൗന്ദര്യമുള്ള സ്വപ്നഭൂമി. എങ്ങനെ ആ സ്വപ്നം എത്തിപ്പിടിക്കും? അവിടേക്കു വഴിയുണ്ടോ? വാഹനങ്ങൾ? ദൂരമെത്ര? പോകുന്ന ദൂരത്തിലേറെ പോകുമ്പോഴല്ലേ യാത്ര യാത്രയായി മാറുന്നത്...

- പി.എഫ്.മാത്യൂസ്

യാത്രാനുഭവം എഴുതാൻ ഒരിടം തേടിയപ്പോഴാണ് ഷാൻഗില ഓർമ യിൽ തടഞ്ഞത്. എന്റെ എഴുത്തും ജീവിതവുമായി ബന്ധമില്ലാത്ത ഒരിടമാണ് വേണ്ടത്. പണ്ട്, ഓന്തുകൾക്കും ദിനോസറുകൾക്കും മുൻപ്, ഓർമകളുടെ അങ്ങേയറ്റത്തെ ഇടനാഴിയിലെ വിദ്യാലയത്തിൽ വച്ച് രണ്ടാം പാഠപുസ്തകമായി പഠിച്ചതാണ് ആ നോവൽ. 1933ൽ എഴുതപ്പെട്ട ലോസ്റ്റ് ഹൊറൈസൺ എന്നു പേരുള്ള ആ പുസ്ത കത്തിലാണ് അതിമനോഹരമായ ഷാൻ ഗില എന്ന മായികമായ ഗ്രാമമുള്ളത്. ലാമമാർ ധ്യാനിക്കുന്ന, ഹിമാലയത്തിന്റെ താഴ്വാരത്തിലുള്ള ഈ ഗ്രാമത്തിലെത്തുന്ന മനുഷ്യർക്കു മരണമില്ലെന്നും അവർ അതീവ സന്തോഷത്തോടെ അനശ്വരരായി മാറുമെന്നുമാണ് ജെയിംസ് ഹിൽറ്റൻ എന്ന നോവലിസ്റ്റ് പറഞ്ഞു വച്ചത്. ടിബറ്റിനെ തൊട്ടു നിൽക്കുന്നവയ്ക്കെല്ലാം മായികഭംഗിയും ആത്മീയ തേജസ്സുമുണ്ട്. ഷാൻ ഗിലപോലെ സാധാരണ മനുഷ്യന്റെ കണ്ണുകളിൽ നിന്നു മറഞ്ഞുനിൽക്കുന്ന ഏഴ് ഇടങ്ങൾ ഈ ഭൂമിയിലുണ്ടെന്ന് ടിബറ്റിലെ പുരാലിഖിതങ്ങൾ പറയുന്നു. ഒൻപതാം നൂറ്റാണ്ടിൽ ടിബറ്റിനെ വജ്രയാനം പഠിപ്പിച്ച ഇന്ത്യൻ ഗുരു പദ്മസംഭവയാണ് ഇവ സ്ഥാപിച്ചത്. അങ്ങനെയുള്ള ഒരിടം നമ്മുടെ തൊട്ടരികിലുണ്ടെന്ന് കേട്ടിട്ടാണ് മൈസൂരുവിൽ നിന്ന് വെറും എൺപത്തി യേഴു കിലോമീറ്റർ അകലെയുള്ള ബൈലക്കുപ്പെയിലെ ആശ്രമ ഗ്രാമത്തിലേക്കു ഞങ്ങൾ പുറപ്പെട്ടത്.

ഒരു ടിബറ്റൻ പ്രണയകഥ

ഞാനവിടേക്ക് ആദ്യം പോയത് കോവിഡിനു മുൻപാണ്. സ്നേഹിതനായ സുധിയുടെ കണ്ണൂർ ഇരിട്ടിയിലുള്ള വീട്ടിൽ രാത്രി തങ്ങി അവിടെ നിന്ന് 95 കിലോമീറ്റർ ദൂരം കാറിൽ സഞ്ചരിച്ച് ബൈലക്കുപ്പയിൽ എത്തുമ്പോൾ മനസ്സു പറഞ്ഞു ഇതുതന്നെയാണ് ആ സ്വപ്നഭൂമി, ഷാൻ ഗില. ആ യാത്രയ്ക്കിടയിൽ വണ്ടിയോടിച്ചിരുന്ന ഇരിട്ടിക്കാരനും ഗായകനുമായ സേവ്യർ രാജു പാതിവഴിയെത്തിയപ്പോൾ വിഷാദിയായി. അതു കണ്ടു ഞാനൊന്നു പതറി.

കുഴപ്പം വല്ലതുമുണ്ടോ? വഴി തെറ്റിയോ?