കുറവുകളില്ലാതെ പുതുക്കാം അടുക്കള

പഴയ അടുക്കളയ്ക്ക് ഉണ്ടാകാവുന്ന 20 പ്രശ്നങ്ങളും പുതുക്കിപ്പണിയുമ്പോൾ അതിനുനൽകേണ്ട പരിഹാരങ്ങളും

- ശ്രീദേവി

അടുക്കളയാണ് വീടുകളിലെ വിഐപി. വർക്കിങ് കിച്ചനും ഷോ കിച്ചനുമൊക്കെയായി ഇപ്പോൾ മുറികളിലെ "ടെക്കി' ആണ് അടുക്കള. അടുക്കളജോലി സൗകര്യപ്രദവും ആയാസരഹിതവുമാക്കാൻ സഹായിക്കുന്ന ഉപകരണങ്ങളിലും നിർമാണ സാമഗ്രികളിലും അത്രയേറെ പുതുമകളാണ് വന്നിട്ടുള്ളത്. പതിനഞ്ചോ ഇരുപതോ വർഷം മുൻപ് നിർമിച്ച അടുക്കളയ്ക്കു പോലും കാലത്തിനനുസരിച്ചുള്ള പുതുക്കിപ്പണിയൽ ആവശ്യമാണ്. പഴയ അടുക്കള പുതുക്കുമ്പോൾ നേരിടേണ്ടി വരുന്ന 20 പൊതു പ്രശ്നങ്ങളും അവയുടെ പരിഹാരങ്ങളും.

കടന്നുവരട്ടെ കാറ്റും വെളിച്ചവും

പുതുക്കിപ്പണിയുമ്പോൾ അടുക്കളയിൽ കാറ്റും വെളിച്ചവും വേണ്ടത്ര കിട്ടാൻ പാകത്തിന് ജനൽ കൊടുക്കണം. ജോലികൾ എളുപ്പമാക്കാനുള്ള പുതിയ ഉപകരണങ്ങൾ വന്നതോടെ ജനലിന്റെ സ്ഥാനത്തിനും മാറ്റങ്ങൾ വന്നു. സിങ്കിന്റെ മുകളിൽ അല്ലെങ്കിൽ ഹോബിന്റെ മുകളിലാണ് സാധാരണ ജനൽ നൽകുന്നത്. കഴുകി വയ്ക്കുന്ന പാത്രങ്ങളിലെ വെള്ളം വാർന്നുപോകാൻ സിങ്കിനു മുകളിൽ ഗ്ലാസ് ആൻഡ് പ്ലേറ്റ് വിത് ഡ്രിപ് ' (gtpt) സ്ഥാപിക്കുന്നത് സൗകര്യപ്രദമാണ്. 60 സെമീ, 90 സെമീ അളവുകളിലാണ് ജിടിപിടി ലഭിക്കുന്നത്. അതിനു തടസ്സമാകാത്ത വിധത്തിൽ സിങ്കിന്റെ ഇരുവശങ്ങളിലും ജനൽ കൊടുക്കാം.

ഹോബിനു മുകളിൽ ഹുഡ് ഉണ്ടെങ്കിൽ അതും ജനൽ വയ്ക്കുമ്പോൾ പരിഗണിക്കണം. തിരശ്ചീനമായ "സ്ട്രിപ്' ആകൃതിയിലുള്ള ജനൽ കൊടുക്കുകയാണ് ഇത്തരം സാഹചര്യങ്ങളിൽ ചെയ്യുന്നത്. പാചകം കഴിഞ്ഞ ശേഷം ജനൽ തുറന്നിടുന്നത് ഹുഡിന്റെ പ്രവർത്തനം കാര്യക്ഷമമാക്കാൻ സഹായിക്കും.

2. നിവർന്നു നിന്നു പാചകം

പഴയ അടുക്കളകളിലെ പ്രധാന പ്രശ്നമാണു കൗണ്ടർടോപ് അല്ലെങ്കിൽ പാതകത്തിന്റെ ഉയരക്കുറവ്. 90 സെമീയാണ് കൗണ്ടർടോപ്പിന്റെ സ്റ്റാൻഡേർഡ് അളവ്. ഇന്ത്യക്കാർക്ക് യൂറോപ്യരെ അപേക്ഷിച്ച് ഉയരം കുറവായതിനാൽ കൗണ്ടർടോപ്പിന് 82-83 സെന്റിമീറ്റർ നൽകിയാൽ വല്ലാതെ കുനിയാതെയും കൈമുട്ടിന് ആയാസമില്ലാതെയും ജോലികൾ ചെയ്യാൻ കഴിയും.

സ്കേർട്ടിങ്ങിന് 10 സെമീ, കബോർഡിന് 70 സെമീ, ഗ്രാനൈറ്റിന് 2-3 സെമീ എന്നിങ്ങനെയാണ് കണക്ക്. എന്നാൽ ഡിഷ് വാഷറിന്റെ സ്റ്റാൻഡേർഡ് ഉയരം 90 സെമീ ആയതിനാൽ ഡിഷ് വാഷർ ഉണ്ടെങ്കിൽ മാത്രം ആ ഭാഗത്തെ കാബിനറ്റുകൾക്കെങ്കിലും 90 സെമീ ഉയരം നൽകേണ്ടിവരും.

3. മാറ്റ് ഫിനിഷ് ആകട്ടെ നിലം