കുട്ടികളോട് എങ്ങനെ പറയാം

കുട്ടികളുടെ ജീവിതത്തിൽ ഒരു പ്രതിസന്ധിയുണ്ടായാൽ അധ്യാപകരും രക്ഷിതാക്കളും അതെങ്ങനെയാണു കൈകാര്യം ചെയ്യേണ്ടത് ?

- വിജീഷ് ഗോപിനാഥ്

കൗമാരക്കാരായ കുട്ടികളാണ് ഈ സംഭവത്തിലെ നായകർ. കുടുംബങ്ങൾ ഇപ്പോഴും വലിയ ട്രോമയിലൂടെ കടന്നു പോവുന്നതു കൊണ്ട് യഥാർഥ സ്ഥലവും പേരും പറയുന്നില്ല. അവരെ സേതു എന്നും മഹേഷ് എന്നും വിളിക്കാം. രണ്ടു പേരും ഒരേ സ്കൂളിൽ. മഹേഷ് പത്തിലും സേതു പ്ലസ് ടു വിനും പഠിക്കുന്നു.

ഒരവധി ദിവസം. സേതു മഹേഷിന്റെ വീട്ടിലെത്തി. രണ്ടു പേരും അടുത്തുള്ള പാറമടയിലേക്ക് നീന്താൻ പോയി. മഹേഷിനു കാര്യമായി നീന്തലറിയില്ല. കുറച്ചു നീന്തിയ ശേഷം അവൻ കരയിലേക്കു കയറി. പക്ഷേ, സേതു പിന്നെയും മുന്നോട്ടു പോയി. വെള്ളക്കെട്ടിന്റെ നടുക്കു വച്ച് മസിലുകൾക്കു പരുക്കേറ്റു തിരിച്ചു നീന്താൻ പറ്റിയില്ല. വെള്ളത്തിനടിയിലേക്ക് അവൻ മുങ്ങിപ്പോയി. പേടിച്ചു പോയ മഹേഷ് വീട്ടിലേക്ക് ഓടി. എന്തുചെയ്യണമെന്ന് അറിയാതെ ഭയന്നു വിറച്ചു മുറിക്കുള്ളിൽ അടച്ചിരുന്നു.

വൈകുന്നേരം പൊലീസ് എത്തിയപ്പോഴാണ് വീട്ടുകാർ കാര്യങ്ങളറിഞ്ഞത്. മഹേഷാണ് സേതുവിനെ അപായപ്പെടുത്തിയത് എന്ന രീതിയിൽ വാർത്ത പരന്നു. പോലീസ് അന്വേഷണം തുടങ്ങി. കുളത്തിനടുത്തുള്ള സിസിടിവി ദൃശ്യങ്ങൾ പൊലീസ് പരിശോധിച്ചു. ആ ദൃശ്യങ്ങൾ വാസ്തവത്തിൽ അവന്റെ നിഷ്കളങ്കത തിരിച്ചറിയാൻ പൊലീസി നെ സഹായിച്ചു. പെട്ടെന്ന് എല്ലാവരുടെയും ശ്രദ്ധാകേന്ദ്രമായതോടെ അവന് സ്കൂളിൽ തുടരാൻ ബുദ്ധിമുട്ടായി. മറ്റുള്ളവരുടെ ചോദ്യങ്ങളും ചിലപ്പോഴുള്ള പഴിപറച്ചിലുമൊക്കെ താങ്ങാനാകാതെ പുറത്തിറങ്ങാൻ പോലും മടിയായി.