മിടുക്കരായി സ്കൂളിലേക്ക്

സ്കൂളിൽ പോകാൻ മക്കൾ തയാറാണോ? മനസ്സിലാക്കാൻ 10 വഴികൾ

- അമ്മു ജൊവാസ്

വീടാകെ ഓടിനടന്ന കുഞ്ഞിക്കാലുകൾ ഇനി പുത്തൻ ഷൂസുമിട്ട് സ്കൂളിന്റെ പടി ചവിട്ടാനൊരുങ്ങുകയാണോ ? ഈ സമയത്തു കുട്ടികളേക്കാൾ ആശങ്ക അച്ഛനമ്മമാർക്കാകും.

കുട്ടി കരയുമോ? സ്കൂൾ ഇഷ്ടമാകുമോ? തിരക്കുകൾക്കിടയിൽ കുട്ടിയെ ഒരുക്കി കൃത്യസമയത്തു സ്കൂളിലെത്തിക്കാൻ ആകുമോ? മറ്റു കുട്ടികളുമായി ചങ്ങാത്തത്തിലാകുമോ? ആശങ്കകൾക്ക് അറുതിയില്ല. സ്കൂളിൽ പോകാൻ മക്കൾ തയാറാണോ എന്നു മനസ്സിലാക്കാൻ ഈ 10 ചോദ്യങ്ങൾ സഹായിക്കും. ചോദ്യങ്ങൾക്കുത്തരം ഇല്ല എന്നാണെങ്കിൽ ചെയ്യേണ്ടതെന്ത് എന്നും അറിയാം.

ഇനി ഒരു മാസം തികച്ചില്ല സ്കൂൾ തുറക്കാൻ ദിനചര്യ കൾ പോലും മാറേണ്ടി വരുമ്പോൾ പുതിയ അന്തരീക്ഷവു മായും കിന്റർഗാർട്ടനിലെ രീതികളുമായും പൊരുത്തപ്പെടാൻ കുട്ടികളെ ഒരുക്കിയെടുക്കാം.

1 നേരത്തേ ഉറങ്ങി ഉണരാറുണ്ടോ ?

ഉറക്കത്തിനു കൃത്യമായ ചിട്ട വേണം. ഇഷ്ടമുള്ളപ്പോൾ ഉറങ്ങിയും ഉണർന്നും ശീലിച്ച കുട്ടിയെ ശരിയായ ദിനചര്യയിലേക്കു കൊണ്ടുവരാൻ രണ്ടാഴ്ചയെങ്കിലും വേണ്ടിവരും. കളിച്ചു രസിച്ചു രാത്രി വൈകിയിരിക്കാൻ കുട്ടിയെ അനുവദിക്കരുത്.

ഉറങ്ങാൻ കിടക്കുന്നതിന് ഒന്നര മണിക്കൂർ മുൻപു വരെയേ ടിവി, ഫോൺ, ടാബ് തുടങ്ങിയ ഏതു സ്ക്രീനും അനുവദിക്കാവൂ. നേരത്തെ ഉറങ്ങാനും ഉണരാനും ശീലിപ്പിക്കണം. ഉറക്കത്തിൽ നിന്നു നിർബന്ധിച്ചുണർത്തി ഒരുക്കുമ്പോൾ കുട്ടിമനസ്സ് അസ്വസ്ഥമാകും.

ഉറക്കം നഷ്ടപ്പെടുത്തുന്ന വില്ലനായി സ്കൂൾ കുട്ടിയുടെ മനസ്സിൽ ഇടംപിടിക്കും. ആ ചിന്ത അവരെ സ്കൂളിൽ നിന്ന് അകറ്റും. മടിയും വാശിയുമാകും പിന്നീട്. മാത്രമല്ല, നേരത്തെ ഉണർന്നാലേ പ്രാഥമിക കാര്യങ്ങൾക്കു ശേഷം ചെറിയൊരിടവേള എടുക്കാനും അതു കഴിഞ്ഞു സാവധാനം പ്രാതൽ കഴിക്കാനും പറ്റൂ.

2 ക്രമമായ ഭക്ഷണശീലം ഇല്ലേ ?

സ്കൂളിൽ പേകേണ്ട സമയം കണക്കാക്കി എപ്പോൾ ബ്രേക്ഫാസ്റ്റ് കഴിപ്പിക്കണമെന്നു മനസ്സിലാക്കുക. ആ സമയത്തു പ്രാതൽ നൽകി ഇപ്പോൾ മുതൽ ശീലിപ്പിക്കാം.

സ്കൂളിലെ ബ്രേക് ടൈമിലാണ് ബ്രേക്ഫാസ്റ്റ് കഴിക്കുന്നതെങ്കിൽ കൂടി പാലും നട്സും ഈന്തപ്പഴവും ചേർത്തുണ്ടാക്കിയ എനർജി ബോൾ പോലുള്ള ലഘുഭക്ഷണം നൽകി സ്കൂളിലേക്കു വിടുന്നതു നല്ലതാണ്.

ആഹാരം തനിയെ വാരിക്കഴിക്കാൻ കുഞ്ഞിനെ പരിശീലിപ്പിക്കണം. വലിയ ട്രേയിൽ പ്ലേറ്റ് വച്ച് ആഹാരം നൽകാം. ഭക്ഷണം ട്രേയിലേക്കു വീഴാതെ കഴിക്കാൻ പറയണം. ടിവി കണ്ടിരുന്ന് ആഹാരം കഴിക്കുന്ന ശീലം വേണ്ടേ വേണ്ട.