സ്വാതന്ത്ര്യം എന്ന പുഞ്ചിരി

ലോകത്തിലെ ഏറ്റവും സമ്പന്നയായ മലയാളി വനിത സാറാ ജോർജ് മുത്തൂറ്റ് പറയുന്നു. 'പണമല്ല, സ്നേഹവും സമാധാനവുമാണ് സന്തോഷം...

- വിജീഷ് ഗോപിനാഥ്

നാലാം ക്ലാസുവരെ വീടായിരുന്നു സാറയുടെ സ്കൂൾ. അച്ഛൻ കെ.എം.പോൾ മുണ്ടക്കയത്ത് എസ്റ്റേറ്റിൽ. വീടിനടുത്ത് സ്കൂളൊന്നുമില്ല. ആളൊഴിഞ്ഞ വഴിയിലൂടെ കിലോമീറ്ററു കളോളം നടന്ന് ഒറ്റയ്ക്കു സ്കൂളിലേക്കു വിടാൻ അമ്മയ്ക്കും അച്ഛനും പേടി. അങ്ങനെ വീടിനുള്ളിൽ ചിറകൊതുക്കി ഇരുന്ന മകൾക്ക് അമ്മ തങ്കമ്മ പോൾ കഥയുടെ ആകാശങ്ങൾ തുറന്നിട്ടു. കാരുണ്യം കൊണ്ടു ലോകം കീഴടക്കിയ ഒരുപാടു പേരുടെ കഥകൾ കേട്ടു സാറാ വളർന്നു. ജീവിതത്തിൽ അന്നദാനവും വസ്ത്രദാനവും ഗൃഹദാനവും ചെയ്യണമെന്ന് ആ കഥകളിലൂടെ അമ്മ പറഞ്ഞു കൊടുത്തു.

അപ്പോൾ സാറാ ആലോചിക്കും, ഞാൻ കഴിക്കുന്നതിൽ നിന്ന് ഒരു പങ്ക് ദാനമായി നൽകുന്നുണ്ട്. എന്റെ വസ്ത്രങ്ങളും നൽകുന്നുണ്ട്. പക്ഷേ, ഭവന ദാനമൊക്കെ ചെയ്യാൻ എന്നെക്കൊണ്ട് സാധിക്കുമോ? ആ സംശയത്തിന് അമ്മ ഉത്തരം നൽകി, ആ കാരുണ്യം ചെയ്യണമെന്നു നീ മോഹിച്ചു കൊണ്ടേയിരിക്കൂ, അതിനുള്ള വഴി ദൈവം തുറന്നു തരും.

അമ്മയുടെ വാക്കുകൾ സത്യമായി. സാധാരണ കുടുംബത്തിൽ ജനിച്ച സാറ പിന്നീട് എം.ജി ജോർജ് മുത്തൂറ്റ് എന്ന ബിസിനസ് അതികായന്റെ ഭാര്യയായി, മുപ്പത്തിയെട്ടു വർഷം ഡൽഹിയിലെ സ്കൂളിൽ പ്രിൻസിപ്പലായി. മുത്തൂറ്റ് ഗ്രൂപ്പിന്റെ ഡയറക്ടറായി. ലോകത്തിൽ ഏറ്റവും സമ്പന്നയായ മലയാളി വനിത എന്ന നേട്ടവുമായി ഫോബ്സ് പട്ടികയിലിടം നേടിയ ആദ്യ മലയാളി വനിതയായി.

“അമ്മ പറഞ്ഞ ആ മൂന്നുകാര്യങ്ങൾ മറന്നിട്ടില്ല. അതു കൊണ്ടു തന്നെ പണം എന്നെ മോഹിപ്പിച്ചിട്ടേയില്ല. ഫോബ്സ് പട്ടികയിൽ ഇടം നേടി എന്നത് ഒരുപാടു സന്തോഷവും അഭിമാനവുമുണ്ട്. അതു മുത്തൂറ്റ് ഗ്രൂപ്പിന് കിട്ടിയ അംഗീകാരമാണ്. ഞാൻ അതിനു നിമിത്തമായെന്നു മാത്രം.

ഫോബ്സ് പട്ടികയിൽ ഇടം നേടിയ ആദ്യ മലയാളി വനിത മനസ്സിലേക്കു വരുന്ന മുഖം ആരുടേതാണ്?

ഒരു സംശയവുമില്ല, ആദ്യം ഓർക്കുന്നതു ഭർത്താവ് എം.ജി ജോർജ് മുത്തൂറ്റിന്റെ മുഖം തന്നെയാണ്. അത്രയും ലളിതമായി ജീവിക്കുന്ന വ്യക്തിയായിരുന്നു അദ്ദേഹം. അതു പോലെ ജോലിയെ ഒരുപാടു സ്നേഹിക്കുന്ന, അധ്വാനിക്കാൻ ഒരു മടിയുമില്ലാത്ത ആൾ. ഓരോ പുതിയ പ്രോജക്ട്ൾക്കും വേണ്ടി സമയം നോക്കാതെ വർക്ക് ചെയ്യുന്ന തു കണ്ടിട്ടുണ്ട്. ഓഫിസിൽ നിന്നു കൃത്യസമയത്തിറങ്ങിയ ഒരു ദിവസം പോലും ഉണ്ടെന്നു തോന്നുന്നില്ല.