ഇതു താൻഡാ പൊലീസ്

പോലീസ് യൂണിഫോമിന്റെ ചുമലിലെ നക്ഷത്രങ്ങൾ ഇപ്പോൾ കൂടുതൽ തിളങ്ങുന്നതു സേനയുടെ ഭാഗമായ വനിതകളുടെ കൂടി കരുത്തിലാണ്

- രൂപാ ദയാബ്ജി

ഈ രംഗം ഒന്നു മനസ്സിൽ സങ്കൽപിച്ചു നോക്കൂ. സംഭവം നടക്കുന്നത് അങ്ങു തലസ്ഥാനത്താണ്. നഗരസഭാ മേയറുടെ കത്തുവിവാദം കൊടുമ്പിരി കൊണ്ടിരിക്കുന്ന കാലം. എന്നും സമരവും അക്രമവും ബഹളവുമായി സംഘർഷഭരിതമാണു രംഗങ്ങൾ.

ജലപീരങ്കി ചീറ്റുന്ന, ബാരിക്കേഡുകൾ നിരന്ന സമരമു ഖത്താണു നമ്മളിപ്പോൾ. മുദ്രാവാക്യം വിളിച്ചും കല്ലേറു ന ടത്തിയും പാഞ്ഞടുക്കുന്ന സമരക്കാർ. ബാരിക്കേഡ് ചാടി കടന്ന്, ബലാബലം മുന്നേറുന്ന ജനക്കൂട്ടം. അവരെ നേരിടാനുറച്ചു. തീ പാറുന്ന പോരാട്ടമുഖത്തേക്കു വന്നിറങ്ങുന്ന കാക്കിക്കാർ.

ലാത്തി കൊണ്ടും ഷീൽഡു കൊണ്ടും നേരിടുന്ന പൊലീസുകാരെ വകഞ്ഞുമാറ്റി മുന്നിലേക്കു കയറാൻ ശ്രമിക്കുന്ന സമരക്കൂട്ടം. അവർക്കിടയിലൂടെ രണ്ടു സ്ത്രീകൾ മുന്നോട്ടു നീങ്ങുന്നു. അവരെ തടയാനായി ചാടിയെത്തുന്ന എസ്ഐ. രണ്ടുപേരെയും കഴുത്തിനു പിടിച്ചു, പിന്നിലേക്കു തള്ളി സീൻ' ക്ലിയറാക്കി ആ പൊലീസുകാരി തിരികെ പോകുന്നു. രണ്ടു സ്ത്രീകളെ ഒറ്റയ്ക്കു നേരിടുന്ന വനിത എസ്ഐയുടെ ഫോട്ടോ പിറ്റേദിവസം പത്രങ്ങളുടെ ഒന്നാം പേജിൽ ഇടം പിടിച്ചു. കാക്കി കുപ്പായവും ലാത്തിയും തൊപ്പിയും കണ്ടാൽ അതിനൊപ്പം മീശ പിരിക്കുന്ന ആൺമുഖം മനസ്സിൽ തെളിയുന്ന കാലം മാറി. കേസന്വേഷണത്തിലും സമരമുഖത്തും പൊലീസ് വനിതകൾ നിറയുമ്പോൾ, ചുമലിൽ നക്ഷത്രമുദിക്കുന്ന കഥകളേറെയുണ്ട് ഇവർക്കു പറയാൻ.

പാസിങ് ഔട്ട് ഫസ്റ്റ് ബാച്ച്

പൊലീസ് സേനയിൽ എസ്ഐ ആയി വനിതകളെ നേരിട്ടു നിയമിക്കുന്ന രീതി ഇല്ലായിരുന്നു, കോൺസ്റ്റബിളായും മറ്റും സേനയിലെത്തിയവർ ഉദ്യോഗക്കയറ്റം നേടിയാണ് എസ്ഐ ആകുന്നത്. എന്നാൽ നാലു വർഷം മുൻപ് എസ്ഐ ആയി ജോലിക്ക് അപേക്ഷിക്കുന്നതിനു സ്ത്രീകൾക്കും അവസരം നൽകി ഉത്തരവിറങ്ങി. അങ്ങനെ 2019 ൽ, വനിതകൾ കൂടി ഉൾപ്പെട്ട എസ്ഐമാരുടെ ആദ്യബാച്ചു പരിശീലനം പൂർത്തിയാക്കിയിറങ്ങി. 121 എസ്ഐമാരിൽ 37 വനിതകളാണ് ഉൾപ്പെട്ടത്.