തുടക്കം കുറിക്കാം വീട്ടിൽ തന്നെ

ലൈംഗിക വിദ്യാഭ്യാസവുമായി ബന്ധപ്പെട്ട് ഒരു നൂറു കാര്യം മാത്രമാണു പലർക്കും അമ്മമാരിൽ നിന്നു പകർന്നു കിട്ടിയിട്ടുള്ളത്

- 

ഞാനൊരു ലൈംഗികതാ വിദ്യാഭ്യാസ അധ്യാപികയും മാനസികാരോഗ്യ പ്രാക്ടീഷനറുമാണ്. കഴിഞ്ഞ എട്ടു വർഷമായി രക്ഷാകർതൃത്വത്തിന്റെ ഭാഗമായി ഇക്കാര്യങ്ങളെ കുറിച്ചുള്ള സത്യസന്ധമായ തുറന്ന സംഭാഷണങ്ങൾ എന്റെ മകളുമായി നടത്തിവരുന്നു. വീട്ടിൽ നിന്നു ലൈംഗിക വിദ്യാഭ്യാസത്തിനു തുടക്കം കുറിക്കുക എന്നതു വളരെ എളുപ്പവും പ്രായോഗികവുമായ ഒന്നാണെന്നാണ് എന്റെ അഭിപ്രായം. അതേക്കുറിച്ചു വിശദമാക്കും മുൻപ് ഒരു ചോദ്യം. "എന്റെ തലമുറയിലുള്ള എത്ര പേർക്കു കൃത്യമായ, ശാസ്ത്രീയമായി ലൈംഗിക വിദ്യാഭ്യാസം ലഭിച്ചിട്ടുണ്ട്?' ഏതായാലും ഒരുപാടു പേർക്കു കിട്ടിയിട്ടില്ല എന്നുറപ്പ്. എന്നാൽ ലൈംഗിക വിദ്യാഭ്യാസവുമായി ബന്ധപ്പെട്ട നൂറു വിഷയങ്ങളിൽ ഒരു നുറുങ്ങു കാര്യം നമുക്ക് അമ്മമാരിൽ നിന്നു പകർന്നു കിട്ടിയിട്ടുണ്ട്. എന്താണത് എന്നല്ലേ? ആർത്തവം തന്നെ.

അതേ, ഞാൻ ചെറുതായിരുന്നപ്പോൾ മാതാപിതാക്കളുമായി ശരീരത്തെ കുറിച്ചു തുറന്നു സംസാരിക്കുന്ന വേളകളിൽ കടന്നു വന്നിരുന്ന ഒരേയൊരു വിഷയം ആർത്തവമായിരുന്നു. അതും അമ്മയോടൊത്ത്.

ഇതു വായിക്കുന്ന പല സ്ത്രീകൾക്കും ഞാനീപ്പറഞ്ഞ കാര്യത്തോടു താരതമ്യപ്പെടാൻ സാധിക്കും. ആർത്തവത്തെ കുറിച്ച് അമ്മ പറഞ്ഞു തരുമ്പോൾ നിങ്ങൾക്ക് 8-12 വയസ്സായിരിക്കും. ചില പെൺകുട്ടികൾക്കു വളരെ വൈകിയാകും ഈ വിവരങ്ങൾ പോലും കിട്ടിയത്. ചിലർക്കു സുഹൃത്തുക്കൾ വഴി പിന്നെയും താമസിച്ചാകാം വിവരങ്ങൾ കിട്ടിയത്. മറ്റു ചിലർക്ക് ആർത്തവവുമായി ബന്ധപ്പെട്ട അറിവുകൾ ഒന്നും കൃത്യമായി ലഭിച്ചിട്ടു പോലും ഉണ്ടാകില്ല.