പഠിച്ചുയരാൻ ലോക കോളേജ്

പതിനൊന്നും പന്ത്രണ്ടും ക്ലാസ്സുകൾ മാത്രം പഠിപ്പിക്കുന്ന ഒരു കോളജ് പക്ഷേ, അവിടെയൊന്നു പ്രവേശനം കിട്ടാൻ ലോകം മുഴുവൻ ശ്രമിക്കുകയാണ്

- മുരളി തുമ്മാരുകുടി, ഡയറക്ടർ ലാൻഡ് ഇനിഷ്യേറ്റീവ്, യുണൈറ്റഡ് നേഷൻസ് നീരജ ജാനകി, കരിയർ മെന്റർ

അമേരിക്കയിലെ നാസ ഇൻസ്റ്റിറ്റ്യൂട്ടിൽ, ആസ്ട്രോഫിസിസിറ്റായ ഊർമിള ചടയംമുറിക്ക് താൻ പഠിച്ച യുണൈറ്റഡ് വേൾഡ് കോളജിനെ കുറിച്ചു പറയാൻ നൂറുനാവാണ്. “മറ്റൊരു സ്കൂളിനോടും താരതമ്യം ചെയ്യാൻ പറ്റാത്ത പഠനാനുഭവമാണ് അവിടെ. ഏറെ സ്വാതന്ത്ര്യവും ചുറ്റുമുള്ളവരിൽ നിന്നു പഠിക്കാനുള്ള ആർജവവും അവിടെ നിന്നാണ് കിട്ടിയത്. എയറോ സ്പേസ് എൻജിനീയറാകണമെന്നായിരുന്നു എന്റെ ആഗ്രഹം. യുഡബ്ല്യുസിയിലെ ഗണിതാധ്യാപികയാണ് എനിക്ക് തിയററ്റിക്കൽ ഫിസിക്സിൽ പ്രത്യേക അഭിരുചിയുണ്ടന്നു തിരിച്ചറിഞ്ഞത്. അതു പഠിക്കാൻ അവർ പ്രചോദനം നൽകി. എന്തിന്, അമേരിക്കയിലെ മൂന്നു കോളജുകളിൽ സ്കോളർഷിപ്പോടെ പഠിക്കാൻ പുറപ്പെടുമ്പോൾ യാത്രാ ടിക്കറ്റും ലാപ്ടോപ്പും പോക്കറ്റ് മണിയും തന്നതും കോളജാണ്.'' കോട്ടയം സ്വദേശി ഊർമിള പറയുന്നു.

പ്രത്യേക വിഷയത്തിൽ ഫോക്കസ് ചെയ്യുന്നതിനപ്പുറം കൂടുതൽ വിശാലമായ മനോഭാവവും അറിവും നേടാൻ തന്നെ സഹായിച്ചത് യുഡബ്ല്യുസിയിലെ പഠനമാണ ജുലു കട്ടിക്കാരനും പറയുന്നു. കൊച്ചിയിലെ സീനിയർ പതോളജിസ്റ്റ് ഡോ. ജോസഫ് കട്ടിക്കാരന്റെയും ഡോ.ജീജിയുടെയും മകളാണ് ജുലു. ലോകത്തിന്റെ നാനാഭാഗങ്ങളിൽ നിന്നുള്ള വിദ്യാർഥികൾ ഒരുമിച്ചു താമസിച്ചു പഠിച്ചതു കൊണ്ട് ഇന്ന് ലോകത്തെവിടെ പോയാലും അവിടെ ഒരു സുഹൃത്തെങ്കിലുമുണ്ടാകും.'' ലോകപ്രശസ്ത നിയമസ്ഥാപനമായ ഡബവോസ് ആൻഡ് പ്ലിംപ്റ്റണിൽ അഭിഭാഷകയായ ജുലു ചിരിയോടെ പറയുന്നു.

 എന്താണ് യു ഡബ്ല്യു സി?