பாரம்பரிய அரிசிகளில் பிஸ்கெட்!

குழந்தைகளுக்கு இன்னிக்கு என்ன லஞ்ச் பாக்சில் கட்டிக் கொடுக்கலாம், ஸ்நாக்ஸ் என்ன கொடுப்பது, காலை சிற்றுண்டிக்கு என்ன செய்யலாம்..?

- மதுரை ஆர்.கணேசன்

இப்படி தினம் தினம் யோசிப்பதே அம்மாக்களுக்கு ஒவ்வொரு நாளும் சவால்தான். அதே சமயம் கடையில் விற்கப்படும் பிஸ்கெட் மற்றும் கேக் போன்ற உணவுகளை வாங்கிக் கொடுத்தாலுமே அது உடலுக்கு தீங்கினை ஏற்படுத்தும்.

அதே நேரம் ஆரோக்கியமான, ஊட்டச்சத்து மிக்க இயற்கை சார்ந்த உணவு வகைளை செய்து கொடுப்பதும் கடினமாகத்தான் இருக்கிறது என்று அலுத்துக் கொள்ளும் அம்மாக்களுக்கா கவே 'நன்சுவை' பெயரில் பாரம்பரிய அரிசி மற்றும் சிறுதானியங்களில் சுவையான பிஸ்கெட்டுகளை தயாரித்து வருகிறார் சேலத்தைச் சேர்ந்த காயத்ரி விமல்ராஜ்.

“சேலம் அருகேயுள்ள சன்னியாசி குண்டு கிராமம்தான் என் சொந்த ஊர். நானும் என் கணவரும் முதுகலைப் பட்டதாரிகள். இருவரும் ஒரே கல்லூரியில் படிக்கும் போது காதல் வயப்பட்டு வீட்டில் உள்ள பெரியவர்களின் சம்மதத்துடன் திருமணம் செய்து கொண்டோம். எங்களுக்கு ஐந்து வயதில் ஒரு மகன் இருக்கிறான்.

நாங்க இருவரும் பிசினஸ் செய்து வருகிறோம். என் அப்பா, அம்மா இருவரும் டெய்லரிங் தொழிலில் ஈடுபட்டு வந்ததால் நானும் அதனை கற்றுக்கொண்டு தொழிலாக செய்து வந்தேன். என் கணவர் காளான், பனீர் போன்றவற்றை மொத்த விலைக்கு வாங்கி விற்பனை செய்து வந்தார்.

ஒரு கட்டத்தில் இருவரும் இணைந்து ஒரு தொழிலில் ஈடுபட வேண்டும் என்ற எண்ணம் ஏற்பட்டது. இயற்கை மீது கொண்ட பற்று காரணமாகவும், பல தேடுதல்களுக்குப் பிறகு டாக்டர் பஸ்லூர் ரகுமான் அவர்களின் உடல் நலம் குறித்த புரிதல்களை தெரிந்து கொண்டோம். அதன் மூலம் நம்மாழ்வார், நெல் ஜெயராமன் அவர்களின் இயற்கை உணவுப் பொருட்கள் மற்றும் பாரம்பரிய நெல் ரகங்கள், அதன் மருத்துவ குணங்களை கற்றுக் கொண்டோம். அது சார்ந்த நிறைய புத்தகங்களை படித்தோம், செய்திகளை சேகரித்தோம். அதில் தினசரி வாழ்வில் பாரம்பரிய அரிசி வகைகளை எளிய முறையில் தின்பண்டங்களாக கொடுக்க முடியும் என்று தெரியவந்தது.