தூக்கம் ஏன் கெடுகிறது?

பசி, தாகம், தூக்கம்... மனிதனுக்கு மட்டுமல்ல, உயிரினங்கள் அனைத்துக்கும் இயல்பு.

- -வரிப்பையூரான்

இவற்றை உரிய நேரம், காலத்தில் சரி செய்தால் நாமும் சரியாக வாழலாம். இல்லையேல் கடுமையான பாதிப்புகள் ஏற்படும் என்பது தான் உறுதியான அறிவியல் உண்மை. தூக்க இழப்பு பல மனநலக் கோளாறுகளுக்கு வழிவகுக்கும். சிந்தனை, நினைவாற்றல் கற்றல் செயல்பாடுகளை பாதிக்கும்.

தூக்கத்தை இழக்கும்போது சரும ஆரோக்கியம் கெட்டு மேனியின் பொலிவு குன்றுகிறது. போதுமான அளவு தூங்காதவர்களுக்கு அதிக மெல்லிய கோடுகள், சுருக்கங்கள், சீரற்ற சரும நிறம் மற்றும் சருமத்தில் குறிப்பிடத்தக்க தளர்வு ஆகியவை இருந்ததாக சரும நிபுணர்களின் ஆய்வின் முடிவுகள் தெரிவித்தன.

தூக்கமின்மையால்தான் பெரிதும் சாலை விபத்து நேரிடுகிறது. ஒவ்வொரு இரவும் 6 மணிநேரத்துக்கும் குறைவாகத் தூங்கினால் வாகன விபத்தில் சிக்குவதற்கான வாய்ப்பு மூன்று மடங்கு அதிகமாவதாக கணிக்கப்பட்டுள்ளது.

இதயம் தொடர்பான ஐரோப்பிய இதழில் வெளியிடப்பட்ட பகுப்பாய்வின்படி:-

குறைந்த நேர உறக்கம் (இரவு 5 மணி நேரத்திற்கும் குறைவானது) மற்றும் நீண்ட நேர உறக்கம் (இரவு 9 மணி நேரத்துக்கு மேற்பட்டது) ஆகிய இரண்டுமே இதய ஆரோக்கியத்தில் எதிர்மறையான விளைவை ஏற்படுத்துவதாக கண்டறியப்பட்டுள்ளது.

ஓர் இரவு தூக்கத்தை தவறவிட்டால் கூட, அறிவாற்றல் சிக்கல் ஏற்படக்கூடும்.

'ஸ்லீப் 'என்ற இதழில் வெளியிடப்பட்ட ஆய்வில்:- உயர் செயல்திறன் கொண்ட உயர்நிலைப் பள்ளி இளம் பருவத்தினரிடம் கூட அகநிலை விழிப்புணர்வு குறைவது தெரிய வந்தது. ஒரு வாரத் தூக்கமின்மைக்கு பின்பு சில இரவுகள் கூடுதலாக தூங்கி ஓய்வெடுத்தபோதிலும், அவர்களால் தங்களின் சிந்தனை மற்றும் நினைவாற்றல் திறனை முழுமையாக மீட்டெடுக்க முடியவில்லை.

ஒரு வார காலத்திற்கு தூக்கத்தை இழந்தவர்களின் டெஸ்டோஸ்டிரோன் அளவு குறைந்ததை ஆய்வில் காணமுடிந்தது. 5 மணி நேரம் அல்லது அதற்கும் குறைவாக தூங்குவது, பாலியல் ஹார்மோன் அளவை 10% முதல் 15% வரை குறைத்தது.

மூளையில் கற்கும் விஷயங்களை ஒருங்கிணைக்கும் செயல்முறைக்கு தூக்கம் இன்றியமையாதது. புதிய தகவல்களை உள்வாங்கி அவற்றை நினைவில் பதிய வைக்க நமக்கு முறையான ஓய்வு தேவை. தொடர்ச்சியாக ஒவ்வொரு இரவும் ஓய்வு தடைபட்டால், ஒட்டுமொத்த சுறுசுறுப்பும் குறைகிறது.