അടർത്തി മാറ്റുന്ന ആനന്ദങ്ങൾ

കൃത്യമായ ഫലം കാത്തിരിക്കുന്ന പരീക്ഷണശാലയാണ് വന്ധ്യതാ ചികിത്സയിൽ സ്ത്രീശരീരം. ആനന്ദങ്ങൾ സ്വീകരിക്കാൻ ആവശ്യമായ ആത്മവിശ്വാസം നഷ്ടമാകുന്ന യാന്ത്രികമായ ചികിത്സക്കാലം കൂടിയാണത്

- ആർ. രാജശ്രീ

2022 കടന്നുപോയിരിക്കുന്നു. കലണ്ടറിലെ അക്കങ്ങൾ ഒരുപക്ഷേ, നമ്മെ അത്ഭുതപ്പെടുത്തിയേക്കാം. പത്തു വർഷത്തിന്റെ കണക്കെടുക്കൂ. കടന്നു പോയ വേഗത്തെക്കുറിച്ചോർത്ത് നാം അമ്പരക്കും. അങ്ങേയറ്റം പുരോഗമിച്ച ഒരു കാലത്താണ് ജീവിക്കുന്നത് എന്നും തോന്നും. പക്ഷേ, ചില കാര്യങ്ങൾ മാറാതെ തന്നെ നിൽക്കുന്നു. സ്ത്രീയെ സംബന്ധിച്ചിടത്തോളം വിശേഷിച്ചും. വിവാഹം, ഗർഭം, പ്രസവം തുടങ്ങിയവയോടുള്ള പുതിയ തലമുറയുടെ കാഴ്ചപ്പാടുകൾ ഒരു പരിധി വരെ മാറിയിട്ടുണ്ട്. അതേ സമയം തന്നെ അത് പരിഷ്കരിക്കപ്പെട്ടവിധത്തിൽ അവരിലേക്കു തന്നെ തിരിച്ചെത്തുന്നുമുണ്ട്. ആർഭാട വിവാഹം വേണ്ട എന്നു തീരുമാനിക്കുന്ന പെൺകുട്ടികളെക്കാൾ കൂടുതലുണ്ടാവും അത് താത്പര്യപ്പെടുന്ന പെൺകുട്ടികൾ, തന്റെ വിവാഹത്തിന് ഓരോ ദിവസവും വേണ്ട ചടങ്ങുകൾ, അതിനുള്ള പ്രത്യേക വസ്ത്രാഭരണാദികൾ, അലങ്കാരങ്ങൾ, ഫോട്ടോഗ്രഫി, ഭക്ഷണം എന്നിവയെക്കുറിച്ചുള്ള വിശദമായ പദ്ധതി തയ്യാറാക്കി രക്ഷിതാക്കളെ ഏൽപ്പിച്ച പെൺകുട്ടികളെ അറിയാം. അതിന്റെ പാതി ചെലവ് പോലും താങ്ങാനാവാത്ത രക്ഷിതാക്കളോട് ദീർഘകാലം പിണങ്ങി നിന്നവരുണ്ട്. ഗർഭകാലത്ത് വിശാലമായ ചടങ്ങുകൾ നടത്താത്തതിന്റെ പേരിൽ വഴക്കിട്ടവരുണ്ട്. നവമാധ്യമങ്ങളിൽ ഇത്തരം ചടങ്ങുകളുടെ വർണാഭമായ ഫോട്ടോകളും വീഡിയോകളും സുലഭമാണ്. വിവാഹം, ഗർഭം, പ്രസവം എന്നിവ സംബന്ധിച്ചുള്ള ചടങ്ങുകൾ സാമൂഹിക സ്വീകാര്യതയുടെ ഭാഗമായി അംഗീകരിക്കപ്പെട്ടവയാണ്. പക്ഷേ, അതിലെല്ലാം സ്ത്രീയ്ക്ക് മാത്രം ബാധകമായ മെരുക്കൽ പ്രക്രിയകളുടെ കൂടി അംശമുണ്ട് എന്നു കാണാം. ഈ മെരുക്കൽ പ്രക്രിയകളുടെ കാൽപനികമായ ആവിഷ്കാരമായി വേണം ഇത്തരം ചടങ്ങുകളെയും അവയുടെ പുതുമ നിറഞ്ഞ ആവിഷ്കാരങ്ങളെയും കാണാൻ. അത് പുതിയ മണവാട്ടിമാർക്ക് എത്രത്തോളം സാധിക്കുന്നുണ്ടെന്നതാണ് ചോദ്യം.