പേരടി പോരാടിയ വഴികൾ

വിട്ടുവീഴ്ചയില്ലാത്ത നിലപാടുകൾ, കെട്ടുറപ്പുള്ള കഥാപാത്രങ്ങൾ...മുറുകിക്കുറുകിയ ജീവിതത്തിന്റെ തിരക്കഥ നാട്യങ്ങളില്ലാതെ ഹരീഷ് പേരടി ഗൃഹലക്ഷ്മിയുമായി പങ്കുവച്ചപ്പോൾ...

- വി. പ്രവീണ

തൊണ്ണൂറുകളുടെ തുടക്കം. കോഴിക്കോട് എരഞ്ഞിക്കൽ യങ് ബഡ്സ് ക്ലബ്ബിലെ കലാസമ്പന്നമായൊരു സായാഹ്നത്തിൽ അവരിരുവരും അന്നാദ്യമായി കണ്ടുമുട്ടി. നർത്തകിയും എസ്. എഫ്. ഐയുടെ സജീവ പ്രവർത്തകയുമായ ബിന്ദുവും നാടകക്കാരനായ ഹരീഷും. കെ.കരുണാകരൻ മന്ത്രിസഭ അധികാരമേറ്റ കാലത്ത് ലാത്തിച്ചാർജിൽ പരിക്കേറ്റ വിപ്ലവ സംഘത്തിലെ പെൺകൊടിയായിരുന്നു സഖാവ് ബിന്ദു. ഹരീഷാകട്ടെ ജയപ്രകാശ് കുളൂരിന്റെ അപ്പുണ്ണി നാടകങ്ങളിലൂടെ നാടക രംഗത്തെ പരിചിത മുഖവും. നർത്തകിയും നാടകക്കാരനും പ്രണയത്തിലായി. അതിനിടെ വീട്ടുകാർ ബിന്ദുവിന് കല്യാ ണം ഉറപ്പിക്കാനൊരുങ്ങി. മുടക്കാൻ വഴിയൊന്നും കാണാതെ ബിന്ദുവും ഹരീഷും ഒളിച്ചോടി. വിപ്ലവകരമായൊരു രജിസ്റ്റർ വിവാഹം.

കമ്മ്യൂണിസ്റ്റ് കുടുംബാംഗമായ ബിന്ദു അങ്ങനെ ചാലപ്പുറത്തെ പേരടിത്തറവാട്ടിലെത്തി. അവരാകട്ടെ തികഞ്ഞ കോൺഗ്രസ്സുകാരും.ജീവിതോപാധിയായി ഇരുവരും പല ജോലികളും ചെയ്തു. അപ്പോഴായിരുന്നു ആ തിരിച്ചറിവ്. അവിടെയും ഇവിടെയും അല്ലറച്ചില്ലറ പണികളും ചെയ്ത് വെറുതെ സമയം കളഞ്ഞിട്ട് കാര്യമൊന്നുമില്ല. ഇതല്ല നമ്മുടെ വഴി.

“നാടകം ആണ് എന്റെ വഴി. ഞാൻ അതിലേക്ക് പോയാൽ നിനക്ക് കുഴപ്പമുണ്ടോ എന്ന് ഹരിയേട്ടൻ ചോദിച്ചു. എനിക്കെന്ത് കുഴപ്പം... ഞാൻ സമ്മതം മൂളി. എനിക്ക് പോകേണ്ടത് എങ്ങോട്ടെ ഞാനും തീരുമാനിച്ചിരുന്നു. ഹരിയേട്ടന്റെ അമ്മയായിരുന്നു അന്നെന്റെ തണൽ. അമ്മയുടെ സഹായത്തോടെ വീട്ടുവളപ്പിൽ ഞാനൊരു നൃത്തവി ദ്യാലയം തുടങ്ങി. എന്തായാലും ആ കടമ്പ പിഴച്ചില്ല. കുറേ കുട്ടികളെ കിട്ടി. കുട്ടികളുടെ അരങ്ങേറ്റവും സ്റ്റേജ് പരിപാടികളും ഒക്കെയായി എനിക്കും കുറേ യാത്ര ചെയ്യേണ്ടിവന്നു. ഹരിയേട്ടൻ നാടകങ്ങളുമായി പലയിടങ്ങളിലായിരിക്കും. എവിടെപ്പോയാലും അമ്മ എനിക്ക് കൂട്ടുവരും. പലപ്പോഴും വീട്ടിൽ തിരികെയെത്താൻ പാതിരാത്രിയൊക്കെയാകും.'' അന്ന് അമ്മ തന്ന പിന്തുണയിലാണ് ഞങ്ങൾ ഇവിടെ വരെ എത്തിയതെന്ന് പറഞ്ഞ് ബിന്ദു പഴയകാലത്തുനിന്ന് മടങ്ങി വന്നു.