'సంఘీ భావం

మూసీ ప్రక్షాళన సమర్థనీయమే.. కానీ

- 

తెలంగాణ రాష్ట్ర రాజధాని హైదరాబాద్ మీదుగా ప్రవహిస్తున్న మూసీ నది ఒకప్పుడు నగరవాసులకు కల్పతరువుగా ఉండేది.గలగల పారే నదీ ప్రవాహం ప్రజల దాహార్తిని తీర్చేది. అయితే క్రమంగా రాజకీయాల జోక్యంతో మూసీ తన నిజస్వరూపాన్ని కోల్పోతూ వచ్చి చివరికి మూసీ ఒక మురికికూపంగా నిలిచింది.అన్ని రాజకీయ పార్టీలు తరతమ బేధం లేకుండా మూసీ మసక బారేలా చేశారు. ఎక్కడికక్కడ ఆక్రమణలకు గురిచేసి కట్టడాలు నిర్మించారు. నగర పరిసరాల్లోని పరిశ్రమలు తమ వ్యర్థాలను, విషతుల్యమైన రసాయనాలు మూసీలో కలుపుతూ వచ్చారు.కాలక్రమేణ మూసీ నది అన్నది ఇక్కడ ఉండేదా అన్న అనుమానాలు కలిగే పరిస్థితి ఏర్పడింది. వాస్తవానికి సుమారు రెండు దశాబ్దాల నుంచే మూసీ ప్రక్షాళన చేయాలన్న ప్రయత్నాలు ప్రారంభమయ్యాయి. అయితే కేవలం ఆర్భాటాలకు, ప్రకటనలకు మాత్రమే పరిమితం అయ్యాయి. ప్రస్తుతం రేవంత్రెడ్డి సిఎం హోదాలో మూసీ ప్రక్షాళనను భుజంపై ఎత్తుకున్నారు. మూసీ ప్రక్షాళనకు ఏ రాజకీయ పార్టీ గాని, స్థానిక ప్రజలు కాని వ్యతిరే కం కాదు. అయితే ప్రస్తుతం ఈ ప్రక్షాళన అంశం సున్నితంగా మారింది. సుమారు మూడు దశాబ్దాలుగా మూసీ గర్భంలో ఇళ్లు నిర్మించుకుని జీనవం సాగిస్తున్న ప్రజలను ఒక్కసారిగా అక్కడి నుంచి తొలగించడం కొంత కష్టతరమైన వ్యవహారంగా ఉంది.ముఖ్యంగా రాజకీయాలు జోక్యం చేసుకోవడంతో మూసీ ప్రక్షాళన ప్రశ్నార్థకంగా మారుతోంది. తాము మూసీని ఏ విధంగా అభివృద్ధి చేస్తున్నామన్న అంశంపై ప్రభుత్వానికి స్పష్టత కరువైంది. ఒకవేళ స్పష్టత ఉన్నా దానిని ప్రజల్లోకి తీసుకువెళ్లడంతో విఫలం చెందు తున్నారు.