రావణుని పూజించే ఆలయాలు..

"మనిషికో భక్తి మహిలో సుమతి” అన్నట్లు ఎవరి భక్తి వారిది. ఇదే కోవలో రాక్షసరాజు రావణ బ్రహ్మకు సైతం ఆలయాలు నిర్మించి పూజించే భక్తజనులు మన దేశంలోనే ఉన్నారంటే ఆశ్చర్యం కలగక మానదు.

- షేక్ అబ్దుల్ హకీం జాని

రామాయణంలో రావణాసురుడు ప్రతినాయకుడిగా అందరికీ సుపరిచితమే.ఇతను పది తలలు కలిగి ఉంటాడు.రాముడు లేని సమయంలో దొంగచాటుగా సీతాదేవిని ఎత్తుకొనిపోయిన కారణంగా రావణుడికి చెడ్డపేరు వచ్చింది. అటువంటి రావణుని దేవునిగా కొలిచే ఆలయాలు ఉన్నాయంటే ఆశ్చర్యం కలగక మానదు. శ్రీరాముడు రావణాసురుని చంపి విజయం సాధించాడు. చెడుపై మంచి సాధించిన విజయానికి గుర్తుగా భారతదేశంలోని అనేక ప్రాంతాలలో దసరా పండుగ సందర్భంగా రావణుని బొమ్మలను ఏర్పాటు చేసి తగలబెడుతుంటారు. అయితే మన దేశంలోని అనేక ప్రాంతాల్లో రావణాసురుడికి గుడి కట్టి పూజిస్తున్నారు. మహాయోధుడు, శివభక్తుడైన రావణాసురుని నాయకుడిగా వీరంతా భావించి పూజిస్తుంటారు. దసరా సందర్భంగా ఢిల్లీలోని రామ్ లీలా మైదాన్ వంటి అనేక ప్రదేశాలలో అతి పెద్ద రావణుని బొమ్మలను ఏర్పాటు చేసి తగలబెడుతుంటారు. ఇటువంటి చర్యలను సైతం రావణుని భక్తులు వ్యతిరేకిస్తుంటారు. లంకాధిపతియైన రావణుని తమ నాయకునిగా పూజించే ఆలయాలు భారతదేశంలో అనేకం ఉన్నాయి.

రావణ దేవాలయం, బిస్రఖ్, నోయిడా

బంగారు లంక రావణాసురుడి జన్మస్థలమని అనేక మంది విశ్వసిస్తారు.జానపద కథల ప్రకారం ఉత్తర ప్రదేశ్లోని గ్రేటర్ నోయిడా సమీపంలో గౌతమ బుద్ధ నగర్ చేరువలో ఉన్న బిస్రఖ్ గ్రామం రావణుడి జన్మస్థలం అని ఈ ప్రాంతవాసులు విశ్వసిస్తారు. ఇది చాలా పురాతన పట్టణం. బిఖ్ పౌరాణిక రాక్షస రాజు రావణుని పూజించే రావణ మందిర్ ఉంది. ఢిల్లీ నుండి ఈ ఆలయం ముప్పై కి.మీ.దూరంలో ఉంటుంది. ఈ ఆలయం భారతదేశంలోని అత్యంత ప్రసిద్ధ రావణ దేవాలయాలలో ఒకటి. ఇక్కడ పది తలల రావణాసురుని విగ్రహం ఉంది.రావణునికి పది తలలు ఉండేలా ఇక్కడే మహాశివుడి నుండి వరదానం పొందినట్లు ఈ ప్రాంత వాసులు చెబుతుంటారు.