மட்டக்களப்பு மாவட்டத்தில் இன முரண்பாட்டையும் இன முறுகலையும் தோற்றுவிக்க முற்படக் கூடாது

அரச தரப்பின் செயற்பாடுகளால் மோசமான விளைவுகள் ஏற்படும் - ஸ்ரீ நேசன் எம்.பி.

- பட்டிருப்பு நிருபர்

உகந்தை மலையில் புதிதாக முளைத்த புத்தர் சிலை விவகாரம் நிச்சயமாக ஒரு இன முரண்பாட்டையும் இன முறுகலையும் தோற்றுவிக்கப் போகிறது என மட்டக்களப்பு மாவட்ட பாராளுமன்ற உறுப்பினர் ஸ்ரீ நேசன் எச்சரித்துள்ளார்.

ஊடகங்களுக்கு நேற்று முன்தினம் (27) கருத்து தெரிவித்த போது, அவர் மேலும் கூறுகையில் கிழக்கு மாகாணத்தின் தென்கோடியில் அமைந்துள்ள உகந்தை முருகன் திருத்தலத்தில் இருக்கின்ற மலை உச்சியில் புதிதாக ஒரு புத்தர் சிலை நிறுவப்பட்டுள்ளது. உகந்தை முருகன் ஆலயத்தை விஸ்தரிப்பதற்கான வேண்டுகோளை நிராகரித்த வனஇலாகா, முருகன் ஆலய வளாகத்தில் புத்தர் சிலையை நிறுவுவதற்கான அனுமதியை வழங்கியது ஏன் என்ற கேள்வி இங்கே எழுகிறது?

புத்த பகவான் அன்புக்கும் பண்புக்கும் தார்மீகத்திற்கும் வழிகாட்டுபவர். அவரை இந்த இழுபறிக்குள் இழுத்து விடக்கூடாது. அவரால் ஒரு இன முரண்பாடும் இன முறுகல்களும் தோற்றுவிக்கப்படக் கூடாது.

குறிப்பாக பௌத்த சாசன அமைச்சு இந்த விடயத்தில் அதிக அக்கறை காட்டி புத்தர் சிலையை அவ்விடத்தில் இருந்தே அகற்றி விட வேண்டும். இது எனது கோரிக்கை. இதனால் பல பிரச்சனைகள் தோன்றுவது தவிர்க்கப்படலாம்.