இரத்த நிலவு சந்திரகிரகணம்

வானில் அவ்வப்போது நிகழும் அதிசய நிகழ்வுகளில் ஒன்றுதான் சந்திர கிரகணம். வானில் சூரியனை பூமி சுற்றி வரும், பூமியை சந்திரன் சுற்றி வரும். வருடத்தில் ஓரிருமுறை மட்டும் இந்த மூன்றும் ஒரே நேர்கோட்டில் பயணிக்கும். சூரியன், பூமி, சந்திரன் ஆகிய மூன்றும் ஒரே நேர்க்கோட்டில் வரும்போது, பூமியின் நிழல் சந்திரன் மீது விழுந்து, அதன் ஒளியைத் தற்காலிகமாக மறைக்கும் நிகழ்வு சந்திர கிரகணம் ஏற்படும். இதன் போது சந்திரனின் பாதி பகுதியோ அல்லது சிறிய அளவு அல்லது முழு பகுதியும் மறைக்கப்படலாம்.

- மு.நிமியா, ஊடகக் கற்கைகள் துறை, யாழ்ப்பாணப் பல்கலைக்கழகம்.

நேற்று ஏற்பட்ட 'இரத்த நிலவு' (டீடழழன ஆழழா) முழு நிலவு சந்திர கிரகணமாகும் . சந்திர கிரகணத்தின்போது சந்திரன் சிவப்பு நிறத்தில் தோன்றியதால் 'இரத்த நிலவு' (டீடழழன ஆழழா) என்று அழைக்கப்படுகிறது. செப்டம்பர் 7, 2025 நேற்றைய தினம் ஆரம்பித்த முழு சந்திர கிரகணம், இந்த ஆண்டின் கடைசி மற்றும் அரிதான இரத்த நிலவு நிகழ்வாகும். இந்த அரிய நிகழ்வு, அறிவியல் ரீதியாக எவ்வாறு விளக்கப்படுகிறது, ஆன்மீக மற்றும் கலாசார ரீதியாக பார்க்கப்படுகிறது.

அறிவியல் கண்ணோட்டம்: இரத்த நிலவு ஏன் சிவப்பு நிறத்தில் தெரிகிறது?

இரத்த நிலவு என்பது ஒரு முழு சந்திர கிரகணத்தின் போது நிகழ்ந்த ஒரு இயற்கையான வானியல் நிகழ்வு. கிரகணத்தின் போது, சந்திரன் முழுவதுமாக பூமியின் நிழலுக்குள் நுழைகிறது. அப்போது சூரிய ஒளியின் நேரடிப் பார்வை சந்திரனுக்குக் கிடைப்பதில்லை. அதனை புவி மறைத்துவிடும். எனினும், சூரியனில் இருந்து வரும் ஒளிக்கதிர்கள் முழுமையாகத் தடுக்கப்படுவதில்லை. பூமியின் வளிமண்டலம் ஒரு பெரிய வில்லை (டநளெ) போலச் செயல்பட்டு, ஒளியைக் குவித்து, அதை சந்திரனின் மீது செலுத்துகிறது.

இந்த ஒளியானது பூமியின் வளிமண்டலத்தின் வழியே பயணிக்கும்போது, ஒரு குறிப்பிட்ட செயல்முறை நிகழ்கிறது. ஒளியில் உள்ள பல்வேறு வண்ண அலைநீளங்களில், நீல நிற ஒளி அலைநீளங்கள் ரெய்லே சிதறல் (Rayleigh Scattering) என்ற நிகழ்வு காரணமாக வளிமண்டலத்தில் அதிக அளவில் சிதறடிக்கப்படுகின்றன. வானம் நீல நிறத்தில் தெரிவதற்குக் காரணமும் இதுவே. ஆனால், சிவப்பு மற்றும் ஆரஞ்சு நிற அலைநீளங்கள் குறைவான சிதறல் அடைவதால், அவை வளிமண்டலத்தைத் தாண்டிச் சென்று பூமியின் நிழல் வழியாகப் பயணித்து சந்திரனின் மீது விழுகின்றன. இதன் விளைவாக, நிலவு பழுப்பு, செம்பு அல்லது அடர் சிவப்பு நிறத்தில் காட்சியளிக்கிறது. இந்த நிகழ்வுதான் 'இரத்த நிலவு' என அறிவியல் பூர்வமாக அழைக்கப்படுகிறது.

இந்த ஒளியின் நிறமும் அதன் அடர்த்தியும் பூமியின் வளிமண்டலத்தில் உள்ள தூசி, மேகங்கள் மற்றும் பிற துகள்களின் அளவைப் பொறுத்து மாறுபடும்.