Vry van verslawing ná lang pad

Monique Bolton moes op 33-jarige ouderdom die waarheid in die oë kyk - alkohol was nie meer iets wat sy beheer het nie ... dit het háár beheer.

- Letitia Van Zyl-Schultz

"Al die jare het ek gedink ek is in beheer," vertel sy. "Maar daar kom 'n tyd wanneer jou hele dag se roetine om alkohol draai en jy nie meer sonder dit kan oorleef nie."

Wat eens begin het as iets wat plesier gebring het, het geleidelik verander in iets veel donkerder. Sy het plekke vermy waar geen alkohol was nie, haarself al hoe meer van ander afgesonder en uiteindelik agter geslote deure gedrink. "Wanneer die lekker daarvan eensaamheid word, weet jy iets is verkeerd. Ek wou nooit aanvaar alkohol was 'n probleem nie."

Die pad na herstel was egter nie een-voudig nie. Volgens Monique was sy self haar grootste struikelblok. "Ek wou nie myself aan AA oorgee nie. Ek was bang - bang oor hoe ek sonder alkohol sou oorleef."

Dit was deur Alkoholiste Anoniem (AA) dat sy geleer het om haar lewe weer dag vir dag aan te pak. "AA het my geleer om sekere plekke, mense en dinge te vermy en om alles een dag op 'n keer te pak."