சிறப்பு விசாரணைக் குழு ஏன்?

கரூர் சம்பவத்தில் உயர்நீதிமன்றத்துக்கு உச்சநீதிமன்றம் கேள்வி

- நமது நிருபர்

கரூர் நெரிசலில் சிக்கி 41 பேர் உயிரிழந்த சம்பவத்தை இரு நீதிபதிகள் கொண்ட மதுரை அமர்வு விசாரணைக்கு எடுத்துக் கொண்ட போது, சிறப்பு விசாரணைக் குழு விசாரணைக்கு சென்னை உயர்நீதிமன்ற தனி நீதிபதி உத்தரவிட்டது ஏன் என்பது உள்ளிட்ட கேள்விகளை உச்சநீதிமன்றம் வெள்ளிக்கிழமை எழுப்பியது.

இந்த விவகாரத்தில் சுதந்திரமான விசாரணை கோரி தமிழக வெற்றிக் கழகம் (தவெக) தரப்பிலும், சிபிஐ விசாரணை கோரி பாதிக்கப்பட்டவர்கள் தரப்பிலும் தாக்கல் செய்யப்பட்ட மனுக்களை நீதிபதிகள் ஜே.கே. மகேஸ்வரி, என்.வி. அஞ்சாரியா ஆகியோர் அடங்கிய அமர்வு விசாரித்தது.

அப்போது தவெக தரப்பில் ஆஜரான மூத்த வழக்குரைஞர்கள் கோபால் சுப்ரமணியம், ஆரியமா சுந்தரம் ஆகியோர் முன்வைத்த வாதம்:

கரூர் தேர்தல் பிரசாரத்தின்போது அனைத்து விதிமுறைகளையும் பின்பற்றினோம். நெரிசல் சம்பவத்துக்கு நாங்கள் வருத்தம் தெரிவிக்கிறோம். ஆனால், தேர்தல் பிரசாரம் மேற்கொண்டவர்கள் சம்பவம் நடந்த பிறகு அங்கிருந்து சென்றுவிட்டதாக உயர்நீதிமன்றம் கூறியது ஏற்றுக்கொள்ள முடியாது. விஜய், பிற நிர்வாகிகளை காவல் துறையினர் அங்கிருந்து கட்டாயப்படுத்தி வெளியேற்றினர். மேலும், பாதிக்கப்பட்டவர்களை நேரில் சென்று பார்க்க காவல் துறையினர் அனுமதிக்கவில்லை.