ராஜராஜன், ராஜேந்திர சோழனுக்கு சிலை

தமிழ்நாட்டில் மாமன்னர்கள் ராஜராஜன், முதலாம் ராஜேந்திர சோழன் ஆகியோருக்கு பிரம்மாண்ட சிலைகள் நிறுவப்படும் என பிரதமர் நரேந்திர மோடி தெரிவித்தார்.

- 

அரியலூர், ஜூலை 27:

மேலும், சோழப் பேரரசு புதிய இந்தியாவை உருவாக்குவதற்கான ஒரு பண்டைய பாதையாக உள்ளது என்றும் அவர் புகழ்ந்துரைத்தார்.

அரியலூர் மாவட்டம், கங்கைகொண்ட சோழபுரம் பெருவுடையார் கோயில் வளாகத்தில், மத்திய கலாசாரத் துறை சார்பில் முதலாம் ராஜேந்திர சோழனின் பிறந்த நாள் விழா, பெருவுடையார் கோயில் கட்டத் தொடங்கிய 1000-ஆவது ஆண்டு விழா, தென்கிழக்கு ஆசிய நாடுகளின் மீது படையெடுத்துக் சென்ற 1000-ஆவது ஆண்டு நிறைவு விழா என முப்பெரும் விழாவின் நிறைவு விழா ஞாயிற்றுக்கிழமை நடைபெற்றது.

விழாவில் பங்கேற்ற பிரதமர் மோடி, முதலாம் ராஜேந்திர சோழன் நினைவு நாணயம் மற்றும் தமிழில் பகவத்கீதை, திருமூலர் ஒலிநாடாக்களை வெளியிட்டுப் பேசியதாவது:

140 கோடி இந்தியர்களின் நலனுக்காகவும், நாட்டின் தொடர்ச்சியான முன்னேற்றத்துக்காகவும் பெருவுடையார் பாதத்தில் அமர்ந்து வழிபடும் நல்ல வாய்ப்பு கிடைத்தது.

சோழ மன்னர்கள் இலங்கை, மாலத்தீவுகள், தென்கிழக்கு ஆசிய பகுதிகள் என பல இடங்களில் தங்கள் ராஜதந்திர, வர்த்தக உறவுகளை விரிவுபடுத்தியுள்ளனர். மாமன்னர்கள் ராஜராஜன், முதலாம் ராஜேந்திர சோழன் ஆகியோரின் மரபு இந்தியாவின் தனித்தன்மைக்கும் பெருமைக்கும் ஓர் அடையாளமாகும். சோழப் பேரரசின் வரலாறும், பாரம்பரியமும் இந்தியாவின் உண்மையான ஆற்றலைப் பறைசாற்றுகின்றன. இந்தப் பாரம்பரியம், வளர்ந்த இந்தியாவைக் கட்டி எழுப்ப ஊக்குவிக்கிறது.