நடன மங்கை...

பரதம், மேற்கத்திய நடனம், ஓவியம், மின்விசைப் பலகை இசைத்தல், திருவாதிரை களி நடனம் உள்ளிட்ட கலைப் பயிற்சிகளில் பதினான்கு வயதான ஜ.செ.ஸ்டெனி 12 சாதனைகளை நிகழ்த்தி, 'சாதனைகள் புரிவதற்கு வயது ஒரு தடையில்லை' என்பதை நிரூபித்திருக்கிறார்.

- -சி.சுரேஷ்குமார்

கன்னியாகுமரி மாவட்டத்துக்கு உள்பட்ட கொல்லங்கோடையை அடுத்த மணலியைச் சேர்ந்த ஜஸ்டின் - செலின் பிரியா தம்பதியின் மகளான இவர், சூழால் பகுதியில் உள்ள லிட்டில் பிளவர் சி.பி.எஸ்.இ. பள்ளியில் ஒன்பதாம் வகுப்பு படித்து வருகிறார். இவர் தனது மூன்றரை வயதில் தொடங்கி, பன்னிரெண்டு வயது வரையில் 12 சாதனைகளை நிகழ்த்தியிருக்கிறார்.

சாதனைகள் குறித்து செலின் பிரியா கூறியதாவது:

எனது கணவர் ஜஸ்டின் நடத்திவரும் 'பிரைட் குரூப் ஆஃப் அகாதெமி' கலைப் பயிற்சி நிலைய முதல்வராக, நான் இருந்து வருகிறேன். இங்கு குழந்தைகளுக்கு பரத நாட்டியம், மேற்கத்திய நடனம், மின்விசைப் பலகை (கீ போர்டு), ஓவியம் போன்றவற்றில் பயிற்சி அளித்து வருகிறோம். இதனால் ஸ்டெனிக்கு ஒன்றரை வயதாக இருக்கும்போதே பரத நாட்டியத்தில் பயிற்சியளித்தோம்.