இந்திய பொருள்களுக்கு வரிவிதிப்பு: டிரம்ப் இன்று அறிவிக்கிறார்

இந்தியா உள்ளிட்ட நாடுகள் மீதான அமெரிக்காவின் பரஸ்பர வரிவிதிப்புகளை அதிபர் டொனால்ட் டிரம்ப் புதன்கிழமை (ஏப். 2) அறிவிக்கவுள்ளார்.

- 

புது தில்லி, ஏப். 1:

அமெரிக்க அதிபராக டிரம்ப் இரண்டாவது முறை பதவியேற்ற பின்னர், அந்நாட்டின் பொருளாதாரத்தை மேம்படுத்தும் நோக்கில் பல்வேறு அதிரடி அறிவிப்புகளை வெளியிட்டார். அமெரிக்க பொருள்கள் மீது அதிக வரி விதிக்கும் இந்தியா, சீனா போன்ற நாடுகளின் பொருள்களுக்கு அமெரிக்காவும் பரஸ்பரம் அதே அளவு வரி விதிக்கும்; வரும் ஏப்ரல் 2-ஆம் தேதிமுதல் இந்த பரஸ்பர வரி விதிப்பு நடைமுறைக்கு வரும் என்று அதிபர் டிரம்ப் தெரிவித்தார்.

அதைத் தொடர்ந்து, சீனாவிலிருந்து இறக்குமதி செய்யப்படும் எஃகு, அலுமினிய பொருள்களுக்கு 25 சதவீத இறக்குமதி வரியை முன்கூட்டியே விதித்து அதிபர் டிரம்ப் உத்தரவிட்டார். அதுபோல, வெனிசுலாவிலிருந்து எண்ணெய் மற்றும் எரிவாயுவை வாங்கும் நாடுகளிலிருந்து இறக்குமதி செய்யப்படும் அனைத்துப் பொருள்களுக்கும் 25 சதவீத இறக்குமதி வரியை விதித்தும் உத்தரவிட்டார்.

இந்தச் சூழலில் மத்திய வர்த்தக அமைச்சர் பியூஷ் கோயல் அமெரிக்க பயணம் மேற்கொண்டார். அவர் கடந்த 8-ஆம் தேதி இந்தியா திரும்பிய நிலையில், அமெரிக்க பொருள்கள் மீது விதிக்கும் வரியைக் குறைக்க இந்தியா ஒப்புக்கொண்டுள்ளதாக டிரம்ப் தெரிவித்தார்.

இதனிடையே, அமெரிக்காவின் பரஸ்பர வரி விதிப்பால் ஏற்படும் பாதிப்பிலிருந்து தங்களைப் பாதுகாக்குமாறு இந்திய தொழில் நிறுவனங்கள் மற்றும் ஏற்றுமதியாளர்கள் தரப்பில் மத்திய அரசிடம் கோரிக்கை விடுக்கப்பட்டது.

தொடர் அழுத்தத்தைத் தொடர்ந்து, அமெரிக்காவிலிருந்து இறக்குமதி செய்யப்படும் போர்போன் ரக மது, சில ஒயின் ரகங்கள் மீதான இறக்குமதி வரியை மத்திய அரசு கடந்த பிப்ரவரியில் குறைத்தது.