அல்கராஸ் முன்னேற்றம்; கௌஃப், பாலினிக்கு அதிர்ச்சி

அமெரிக்காவில் நடைபெறும் இண்டியன் வெல்ஸ் ஓபன் டென்னிஸ் போட்டியில், நடப்பு சாம்பியான ஸ்பெயினின் கார்லோஸ் அல்கராஸ் காலிறுதிச்சுற்றுக்கு புதன்கிழமை முன்னேறினார்.

- 

இண்டியன் வெல்ஸ், மார்ச் 13: முன்னாள் சாம்பியனான அமெரிக்காவின் டெய்லர் ஃப்ரிட்ஸ் வெளியேற்றப்பட்டார்.

ஆடவர் ஒற்றையர் 4-ஆவது சுற்றில், உலகின் 3-ஆம் நிலை வீரர் அல்கராஸ் 6-1, 6-1 என்ற நேர் செட்களில், பல்கேரியாவின் கிரிகோர் டிமிட்ரோவை எளிதாக சாய்த்தார். இவர்களின் நேருக்கு நேர் கணக்கில் தற்போது அல்கராஸ் 4-2 என முன்னிலையில் உள்ளார். கடந்த இரு சந்திப்புகளில் டிமிட்ரோவிடம் தோல்வியை சந்தித்திருந்த அல்கராஸ், அதிலிருந்து தற்போது மீண்டிருக்கிறார்.

3-ஆவது வீரர்: இண்டியன் வெல்ஸ் ஓபனில் தற்போது தொடர்ந்து 15 வெற்றிகளைப் பதிவு செய்திருக்கும் அல்கராஸ், அதிக தொடர் வெற்றிகளைப் பதிவு செய்தோர் வரிசையில் ஜோகோவிச் (19), ஃபெடரருக்கு அடுத்தபடியாக 3-ஆவது இடத்தில் உள்ளார். காலிறுதிக்கு முன்னேறியிருக்கும் அல்கராஸ், அதில் ஆர்ஜென்டினாவின் ஃப்ரான்செஸ்கோ செருண்டோலோவுடன் மோதுகிறார். போட்டித்தரவரிசையில் 25-ஆம் இடத்தில் இருக்கும் செருண்டோலோ 7-5, 6-3 என்ற நேர் செட்களில், 9-ஆம் இடத்திலிருந்த ஆஸ்திரேலியாவின் அலெக்ஸ் டி மினாரை சாய்த்து காலிறுதிக்கு முன்னேற்றம் கண்டிருக்கிறார். இவர்களின் நேருக்கு நேர் கணக்கில் செருண்டோலோ 6-1 ஆதிக்கம் செலுத்துகிறார்.