தண்ணீர் வருவதில் சிக்கல் பழவனக்குடி வாய்க்கால் தலைப்பு மாற்றப்படுமா?

திருவாரூர் அருகே பழவனக்குடி பகுதியில் உள்ள சாகுபடி விளைநிலங்கள் பாசன வசதி பெறும் வகையில் வாய்க்காலின் தலைப்பை மாற்றி அமைக்க வேண்டும் என கோரிக்கை விடுக்கப்பட்டுள்ளது.

- சி.ராஜசேகரன்

திருவாரூர், ஜூன் 29: திருவாரூர் அருகே பழவனக்குடி பகுதியில் உள்ள சாகுபடி விளைநிலங்கள் பாசன வசதி பெறும் வகையில் வாய்க்காலின் தலைப்பை மாற்றி அமைக்க வேண்டும் என கோரிக்கை விடுக்கப்பட்டுள்ளது.

கிராமங்களை அதிகம் உள்ளடக்கிய திருவாரூர் மாவட்டத்தில் விவசாயிகள், விவசாயத் தொழிலாளர்கள் அதிகம் உள்ளனர். ஆற்றுப்பாசனத்தை நம்பி பெரும் பகுதி விவசாயம் நடைபெறும் நிலையில், கிராமப்புற பகுதிகளில் பி மற்றும் சி சேனல் வாய்க்கால்கள் மூலமாகவே அதிகமான விளைநிலங்கள் பயனடைகின்றன. வாய்க்கால்கள் சீரமைக்கப்படாதபோது அப்பகுதியின் விவசாயம் பாதிக்கப்படுவதுடன், விவசாயிகள் மற்றும் விவசாயத் தொழிலாளர்கள் வேலையிழப்பு, உற்பத்தி இழப்பு உள்ளிட்ட பல்வேறு சிரமங்களை சந்திக்க வேண்டியுள்ளது.

திருவாரூர் அருகே 4 கி.மீ. தொலைவில் உள்ள பழவனக்குடி ஊராட்சிக்குள்பட்ட பகுதியில் 1,000 குடும்பங்கள் வசிக்கும் நிலையில், பெரும்பாலான குடும்பங்கள் விவசாயத்தை மட்டுமே நம்பி உள்ளன. 400 ஏக்கருக்கு அதிகமான விளைநிலங்கள் சாகுபடிக்காக பயன்பாட்டில் உள்ளன.