சென்னையில் ரூ.13.94 கோடியில் கூடுதல் பள்ளிக் கட்டடங்கள்

இந்து சமய அறநிலையத் துறை சார்பில் சென்னையில் ரூ.13.94 கோடியில் கட்டப்பட்ட கூடுதல் பள்ளிக் கட்டடங்களை முதல்வர் மு.க.ஸ்டாலின் திறந்து வைத்து, மாணவர்களுக்கு கல்வி உதவித்தொகை, மிதிவண்டி ஆகியவற்றை வழங்கினார்.

- 

சென்னை, ஜூன் 27:

சென்னை கீழ்ப்பாக்கத்தில் காஞ்சிபுரம் அருள்மிகு ஏகாம்பரநாதர் திருக்கோயிலுக்கு சொந்தமான இடத்தில் நடத்தப்பட்டு வந்த சீதா கிங்ஸ்டன் மெட்ரிகுலேஷன் பள்ளி, பொருளாதார நெருக்கடியால் திருக்கோயிலுக்கு செலுத்த வேண்டிய வாடகையை நீண்ட காலமாக செலுத்த முடியாத சூழலில் திருக்கோயில் நிர்வாகத்திடம் ஒப்படைக்கப்பட்டது.

இதையடுத்து அந்தப் பள்ளியில் பயிலும் மாணவர்களின் நலனைக் கருத்தில் கொண்ட முதல்வர் மு.க.ஸ்டாலின், அப்பள்ளியை திருக்கோயில் நிர்வாகமே ஏற்று நடத்த உத்தரவிட்டார்.

இதைத் தொடர்ந்து, 2021-ஆம் ஆண்டு முதல் காஞ்சிபுரம் அருள்மிகு ஏகாம்பரநாதர் மெட்ரிகுலேஷன் மேல்நிலைப் பள்ளியாக நடத்தப்பட்டு வருகிறது.

இந்தப் பள்ளியில் தற்போது 981 மாணவ, மாணவிகள் கல்வி பயின்று வருகின்றனர்.