திருச்செந்தூர் கோயிலில் சட்டவிரோத தரிசன டிக்கெட்: நடவடிக்கைக்கு உத்தரவு

திருச்செந்தூர் சுப்பிரமணிய சுவாமி கோயிலில் சட்டவிரோத தரிசன டிக்கெட்டுகள் விற்பனை செய்யப்படுவதைத் தடுக்க, இந்து சமய அறநிலையத்துறையினரும், காவல் துறையினரும் இணைந்து சம்பந்தப்பட்ட நபர்கள் மீது குற்றவியல் நடவடிக்கை எடுக்க வேண்டும் என சென்னை உயர்நீதிமன்ற மதுரை அமர்வு வெள்ளிக்கிழமை உத்தரவிட்டது.

- 

மதுரை, ஆக. 29:

சென்னையைச் சேர்ந்த சண்முகராஜன் உயர்நீதிமன்ற மதுரை அமர்வில் தாக்கல் செய்த பொது நல மனு: திருச்செந்தூர் சுப்பிரமணிய சுவாமி கோயிலில் சிறப்பு தரிசன கட்டணமாக ரூ. 100 நிர்வாகம் தரப்பில் வசூலிக்கப்படுகிறது. கோயிலின் இணையதளத்திலும் பூஜைக்கான டிக்கெட்டுகளைப் பெற்றுக் கொள்ளலாம். கடந்த ஜூலை 26-ஆம் தேதி நான் கோயிலுக்குச் சென்ற போது, பக்தர்கள் கோயிலுக்குள் செல்வதற்கான வழிகள் முறைப்படுத்தப்படவில்லை. இணையதளம் அல்லாமல் சிறப்பு தரிசன கட்டண டிக்கெட்டுகள் விற்கப்படுவதாகக் கூறப்பட்டது. அதைப் பெற்றுக் கொண்டு ஏராளமான பக்தர்கள், அங்கீகரிக்கப்படாத வழிகளில் கோயிலுக்குள் செல்ல முயன்றனர்.